صنوبر کے درخت کی یہ پینٹنگ اونچائی میں ایک میٹر 70 سینٹی میٹر، جبکہ چوڑائی میں 4 میٹر 60 سینٹی میٹر ہے۔ تقریباً تمام ہی پس منظر سنہرے ورق سے مزیّن ہے، جو اس دیوہیکل درخت کی بل کھاتی ساخت کو اور بھی نمایاں کیے ہوئے ہے۔ یہ پینٹنگ 16 ویں صدی کے اواخر میں، ایک ایسے دَور میں تخلیق پائی کہ جب طویل خانہ جنگی کے بعد، اور جاپان کے بارِ دگر اتحاد کے دوران عظیم جنگجو سردار طاقت پکڑ رہے تھے۔ اس شہ پارے کا خالق کانو ائیتوکُو اسی طاقتور حلقے کا منظورِنظر تھا۔ تصویر کشی کا فن اُسے اپنے دادا سے ورثے میں ملا تھا، اُس کا دادا وہ شخص تھا جس نے چین کی اِنک پینٹنگ کی روایت اور رنگوں کے ساتھ پینٹنگ کی قدیم جاپانی روایت کے امتزاج کو فروغ دیا، اور اُس نے ایسی زبردست اور شاندار تصاویر تخلیق کیں جنہیں اعلیٰ فوجی سالاروں نے بے پناہ سراہا۔ یہ پینٹنگ شاہی خاندان کے کسی رکن کی رہائش گاہ کے کاغذی سلائیڈنگ دروازوں پر بنائی گئی تھی، لیکن بعد ازاں، اسے تہہ دار اسکرین میں تبدیل کر دیا گیا۔ ائیتوکُو کی زیادہ تر تخلیقات جنگ کے شعلوں کی نذر ہو گئیں، لیکن یہ پینٹنگ اُس شاندار جمالیات کی ایک یاد کے طور پر آج بھی محفوظ ہے۔