امریکی فوجی اڈوں کے اخراجات میں جاپان کا حصہ مالی سال 2021 میں تبدیل نہیں ہو گا

جاپان اور امریکہ نے اس بات پر اتفاق کیا ہے کہ جاپان میں امریکی افواج کی تعیناتی کے اخراجات میں جاپان کا حصہ، آئندہ مالی سال میں بھی موجودہ سطح پر برقرار رہے گا۔

اخراجات میں جاپان کے حصے کا تعین ہر 5 سال بعد ہوتا ہے۔ جاپان، دیگر اخراجات کے علاوہ امریکی فوجی اڈوں کے ملازمین کی تنخواہیں اور پانی و بجلی جیسی سہولیات کا ایک حصہ برداشت کرتا ہے۔

تازہ ترین مذاکرات نومبر میں سابق امریکی صدر ڈونلڈ ٹرمپ کے دور میں شروع ہوئے تھے، جو جاپان کے حصے میں اضافہ چاہتے تھے۔ تاہم فریقین کسی سمجھوتے پر نہیں پہنچ سکے تھے۔ اخراجات کے حصے کا موجودہ معاہدہ رواں مالی سال کے اختتام تک ہے جو مارچ میں ختم ہو گا۔

دونوں فریقوں نے مالی سال 2021 کے لیے جاپان کا حصہ تقریباً ایک ارب 90 کروڑ ڈالر کی موجودہ سطح پر برقرار رکھنے پر اتفاق کیا۔ فریقین نے، آئندہ سالوں کے لیے جاپان کے حصے پر مذاکرات جاری رکھنے پر بھی اتفاق کیا۔ ان کا منصوبہ رواں سال کسی سمجھوتے پر پہنچنے کا ہے۔