باڑوں میں کام کرنے والے بھارتی کارکنوں کے اہل خانہ کو آگاہی کی فراہمی

شمالی جاپان میں واقع ہوکائیدو کے ایک قصبے نے گھڑ دوڑ میں حصہ لینے والے گھوڑوں کے مقامی باڑوں میں کام کرنے والے بھارتی کارکنوں کے اہل خانہ کو مقامی صنعت سے روشناس کرانے اور ہنگامی حالات میں مدد طلب کرنے جیسے زندگی کے کلیدی معاملات سے متعلق آگہی فراہم کی ہے۔

ریس کے گھوڑوں کی افزائش کے لیے مشہور اُوراکاوا قصبے نے افرادی قوت کی کمی کو پورا کرنے کے لیے بھارت سے گھوڑوں کی دیکھ بھال کرنے والے عملے اور ان کے خاندانوں کی بڑھتی ہوئی تعداد کو رہائشی سہولیات مہیا کی ہیں۔

بھارتی کارکنوں کے خاندانوں کے تقریباً 20 افراد نے قصبے کے بارے میں آگاہی حاصل کرنے کے لیے پیر کے روز ایک دورے میں حصہ لیا۔

انہوں نے ایک اسٹرابیری فارم کا دورہ کیا اور اس مقامی سوغات کو چننے اور چکھنے کا لطف اٹھایا۔

مقامی صنعت کو بہتر طور پر سمجھنے کی بظاہر کوشش میں دورے میں شامل ایک شخص نے موسم گرما کی گرمی کے خلاف کاشت کاروں کے اقدامات کے بارے میں دریافت کیا۔ دورے میں شامل ایک خاتوں نے کاسمیٹکس پر درج جاپانی ہدایات کو سمجھنے میں دشواری محسوس ہونے کا بتایا۔ مقامی فارمیسی کے ایک رکن نے ٹاؤن ہال میں ہونے والے اس ایونٹ میں حصہ لیا اور خاتون کے سوالوں کے جواب دیے۔ انہوں نے جِلد کو دھوپ سے بچانے کے لیے سَن اسکرین اور دیگر مصنوعات بھی متعارف کروائیں۔

ہندی مترجم کے ذریعے ہنگامی ٹیلی فون کال کرنے کا طریقہ جاننے کے لیے بھارتی افراد نے ایک فائر اسٹیشن کا بھی دورہ کیا۔

20 کے پیٹے کی ایک بھارتی خاتون نے کہا کہ انہیں بالکل معلوم نہیں تھا کہ ہنگامی حالات میں کس نمبر پر ٹیلی فون کرنا ہے۔ اس لیے جاپان میں 119 پر کال کرنے کا طریقہ پتہ چلنا سود مند رہا۔

اس ٹور کا اہتمام کرنے والے گروپ کی رکن اِنااوکا چِیہارُو نے کہا کہ وہ قصبے کی مقامی برادری کو بہتر طور پر سمجھنے، بہتر انداز میں معاشرے میں سمونے اور محفوظ طریقے سے زندگی گزارنے میں بھارتی افراد کی مدد کرنا چاہتی ہیں۔