မှတ်ဉာဏ်တွေ ပျောက်ပျက်မသွားအောင် ထိန်းသိမ်းထားပေးမယ်
ဒီတစ်ကြိမ်မှာတော့ ဂျပန်အနောက်ပိုင်း Kochi ခရိုင်က သက်ကြီးရွယ်အို စောင့်ရှောက်ရေး ဂေဟာတစ်ခုကို သွားရောက်လေ့လာကြပါမယ်။ ဒီဂေဟာကို အသုံးပြုသူတွေ အတော်များများက မှတ်ဉာဏ်ချို့ယွင်းတဲ့ရောဂါ ခံစားနေရပြီး သူတို့ရဲ့ အခြေအနေတွေ ပိုပြီး ဆိုးမသွားအောင် တတ်နိုင်သမျှ ထိန်းထားပေးဖို့အတွက် ဝန်ထမ်းတွေက တစ်မူထူးခြားတဲ့ နည်းလမ်းတစ်ခု အသုံးပြုနေပါတယ်။ ဝန်ထမ်းတွေက အွန်လိုင်းကနေ မေးမြန်းမှုတွေလုပ်ပြီး သက်ကြီးရွယ်အိုတွေက ပြန်ပြောင်းပြောပြတဲ့ အတိတ်ကအကြောင်းတွေကို သေချာနားထောင်ပြီး အကုန်ချရေးပါတယ်။ သူတို့ ပြန်လည်အမှတ်ရခဲ့တဲ့ မှတ်ဉာဏ်တွေကို မှတ်တမ်းတင်သိမ်းဆည်းဖို့ ဒီဂေဟာအနေနဲ့ ဘယ်လို ကြိုးပမ်းနေသလဲဆိုတာကို လေ့လာကြရအောင်။
“Choro Daigaku “အသက်ကြီးသူတို့ရဲ့ တက္ကသိုလ်” အမည်ပေးထားတဲ့ သက်ကြီးရွယ်အို စောင့်ရှောက်ရေး ဂေဟာဟာ ကိုရိုနာဗိုင်းရပ်စ် ကူးစက်ပျံ့နှံလာမှုတွေကြောင့် အွန်လိုင်းဗီဒီယိုခေါ်ဆိုမှုကို အသုံးပြုပြီး "kiki-gaki" "နားထောင်ပြီးရေး" တွေ့ဆုံမေးမြန်းခန်း အစီအစဉ်ကို စတင်ပြုလုပ်ခဲ့ပါတယ်။
ဂေဟာကနေ မေးမြန်းနားထောင်၊ စာရေးမှတ်သားတွေလုပ်ဖို့ သီးသန့် ဝန်ထမ်းသစ်ခေါ်ယူတဲ့အခါ နိုင်ငံတစ်ဝန်းက လူအများအပြားက စာရင်းပေးသွင်းခဲ့ကြပါတယ်။
စစ်အတွင်းက အတွေ့အကြုံတွေကို အဓိကထားရေးသားသူ အလွတ်တမ်းစာရေးဆရာ Kido Hisae က တတ်နိုင်သမျှ လူအများအပြားရဲ့ အတွေ့အကြုံတွေကို မှတ်တမ်းတင်နိုင်ရေးမှာ အထောက်အကူဖြစ်စေဖို့ မျှော်လင့်ချက်နဲ့ ဒီအလုပ်မှာ ပါဝင်လုပ်ဆောင်နေပါတယ်။