တိုကျိုခရိုင်က ရှင်းကျုခု မြို့နယ်ဟာ နိုင်ငံခြားသားတွေ အများဆုံးနေထိုင်တဲ့ မြို့နယ်တစ်ခု ဖြစ်ပါတယ်။ တရုတ်နိုင်ငံဖွား မစ္စတာ Dong Xiaoliang ဟာ နိုင်ငံခြားသားတွေနဲ့ ဂျပန်အိမ်ပိုင်ရှင်တွေအကြား ဆက်သွယ်ပေးတဲ့ အလုပ်ကို ကြိုးကြိုးစားစား လုပ်ကိုင်နေပါတယ်။ ဂျပန်မှာ နိုင်ငံခြားသားတွေက အိမ်လို့ခေါ်တဲ့ နေစရာနေရာတစ်ခု ရှာတွေ့နိုင်ဖို့ မစ္စတာ Dong ရဲ့ ကြိုးပမ်းမှုတွေကို အနီးကပ် လေ့လာကြည့်ကြရအောင်။
(၂၀၂၀ ပြည့်နှစ်၊ ဒီဇင်ဘာလ ၂၂ ရက်နေ့က ထုတ်လွှင့်ခဲ့တဲ့ အစီအစဉ် ဖြစ်ပါတယ်။)

ဂျပန်မှာ နှစ် ၂၀ နီးပါး နေထိုင်နေသူ မစ္စတာ Dong Xiaoliang ဟာ နိုင်ငံခြားသားတွေအတွက် အိမ်ခြံမြေ ငှားရမ်းပေးတဲ့ ဝန်ဆောင်မှုကို အထူးလုပ်ကိုင်တဲ့ ကုမ္ပဏီတစ်ခုရဲ့ ဒါရိုက်တာ တစ်ဦး ဖြစ်ပါတယ်။ "Living Support" ဌာနက နိုင်ငံခြားသားတွေကို သူတို့ရဲ့ မိခင်ဘာသာစကားနဲ့ ဝန်ဆောင်မှု ပေးပါတယ်။ အဲဒီ ဝန်ဆောင်မှုအတွက် အိမ်ငှားရမ်းခရဲ့ ၁၀ ရာခိုင်နှုန်းကနေ ၂၀ ရာခိုင်နှုန်းလောက် ကျသင့်မှာဖြစ်ပြီး ဒါ့အပြင် အိမ်ငှားသူအတွက် အာမခံပေးတဲ့ ဝန်ဆောင်မှုကိုလည်း ထပ်ဆောင်းရရှိနိုင်ပါတယ်။ မစ္စတာ Dong ဟာ ကိုရီးယားနိုင်ငံသူ ဇနီးသည် Ai နဲ့အတူ နေထိုင်ပါတယ်။ စုံတွဲတွေ အတူနေထိုင်မယ့် အိမ်ဟာ စိတ်အေးချမ်းသာမှုကို ခံစားရမယ့်နေရာ ဖြစ်ဖို့က အရေးကြီးပါတယ်။ အိမ်ဆိုတာ နေ့စဉ်ဘဝရဲ့ အခြေခံအုတ်မြစ် တစ်ခုပါ။ ဒါဟာ မစ္စတာ Dong လေးလေးနက်နက် ယုံကြည်ထားတဲ့အရာ ဖြစ်ပါတယ်။