နိုင်ငံခြားမှာ ကြီးပြင်းခဲ့တဲ့ ကျောင်းသားတွေကို ဘာသာစကားဆိုင်ရာ ထောက်ပံ့ပေးဖို့ ပညာရှင်တွေအကြံပြု

နိုင်ငံခြားမှာ ကြီးပြင်းခဲ့တဲ့ အထက်တန်းကျောင်းသားတွေ အတွက် ဂျပန်ဘာသာစကား လမ်းညွှန်မှုတွေ ပိုမိုကောင်းမွန်လာရေးဆိုင်ရာ အဆိုပြုချက်တွေကို ဂျပန်ပညာရေးဝန်ကြီးဌာနရဲ့ ကျွမ်းကျင်ပညာရှင်များအဖွဲ့က ပြုစုခဲ့ပါတယ်။

အဲဒီလို နိုင်ငံခြားမှာ ကြီးပြင်းခဲ့တဲ့ ကျောင်းသားအရေအတွက် ဂျပန်မှာ များပြားလာနေပါတယ်။ ၂၀၁၈ ခုနှစ်မှာကောက်ယူခဲ့တဲ့ ပညာရေးဝန်ကြီးဌာနရဲ့ စစ်တမ်းတစ်ခုအရ ပြည်သူပိုင် အထက်တန်းကျောင်းတွေက ကျောင်းသား ၄,၁၇၂ ဦးဟာ ဂျပန်ဘာသာစကား လမ်းညွှန်မှု လိုအပ်နေတာကို တွေ့ရပါတယ်။ အဲဒီကိန်းဂဏန်းဟာ ၁၀ နှစ်အတွင်းမှာ ၂.၇ ဆ တိုးလာခဲ့တာဖြစ်ပါတယ်။
အဲဒီလိုကျောင်းသားတွေရဲ့ ၁၀ ရာခိုင်နှုန်း နီးပါးလောက်ဟာ ဘာသာစကားဆိုင်ရာ အခက်အခဲတွေကြောင့် ကျောင်းထွက်သွားခဲ့ကြပါတယ်။ အဲဒီအရေအတွက်ဟာ ဂျပန်တစ်နိုင်ငံလုံးက ပြည်သူပိုင် အထက်တန်းကျောင်း အားလုံးရဲ့ ကျောင်းထွက်နှုန်းဖြစ်တဲ့ ၁ ရာခိုင်နှုန်းထက် အများကြီးကျော်လွန်နေပါတယ်။
ဗုဒ္ဓဟူးနေ့ကပြုလုပ်ခဲ့တဲ့ အဲဒီပညာရှင်အဖွဲ့ အစည်းအဝေးမှာ မူလတန်းနဲ့ အလယ်တန်းကျောင်းတွေမှာလိုမျိုး အထူးပို့ချ သင်ခန်းစာတွေကို အထက်တန်းကျောင်းတွေမှာလည်း ထားရှိဖို့ အဲဒီအဖွဲ့က တောင်းဆိုတိုက်တွန်းလိုက်ပါတယ်။
ကျောင်းသားရဲ့ ဘာသာစကား နားလည်ကျွမ်းကျင်မှု အဆင့်နဲ့အညီ တစ်ဦးချင်းအလိုက် လမ်းညွှန်မှုတွေ လိုအပ်ကြောင်း အဲဒီပညာရှင်အဖွဲ့က အလေးပေးပြောဆိုခဲ့ပါတယ်။ အဲဒီလိုအတန်းတွေကို တက်ရောက်တာအတွက်လည်း အမှတ်ပေးဖို့ တိုက်တွန်းထားပါတယ်။
အမြတ်အစွန်းပဓာနမထားတဲ့ အဖွဲ့တွေနဲ့ တခြားဆက်နွှယ်နေတဲ့အဖွဲ့တွေမှာ လုပ်ကိုင်နေတဲ့ အထူးနားလည်တတ်ကျွမ်းမှုရှိတဲ့ ဂျပန်ဘာသာစကား ညွှန်ကြားပြသသူတွေနဲ့ ပူးပေါင်းလုပ်ဆောင်ဖို့ကိုလည်း အဆိုပြုထားပါတယ်။ ယဉ်ကျေးမှုပေါင်းစုံ ရှင်သန်ရေးကို ပံ့ပိုးပေးတာနဲ့ အဲဒီလိုလုပ်ဆောင်တဲ့သူတွေ ပေါ်ထွန်းလာအောင် ပြုစုပျိုးထောင်ရေးတွေကို တိုးမြှင့်လုပ်ဆောင်ဖို့ တိုက်တွန်းထားပါတယ်။
ဂျပန်ဘာသာစကား သင်ကြားတဲ့ကျောင်းတွေအတွက် လုပ်ငန်းမူဘောင်နဲ့ ညွှန်ကြားချက်တွေကိုသတ်မှတ်ဖို့ ဂျပန်အစိုးရကို အဲဒီပညာရှင်အဖွဲ့က တိုက်တွန်းထားပါတယ်။