ပမာဏ ပိုပြီးသေးငယ်တဲ့ ကိုရိုနာဗိုင်းရပ်စ် ကာကွယ်ဆေး လက်တွေ့စမ်းသပ်မှုတွေကို ခွင့်ပြုမယ်

ကမ္ဘာတစ်ဝန်း ကိုရိုနာဗိုင်းရပ်စ် ကာကွယ်ဆေး တီထွင်ထုတ်လုပ်ရေးကို အားဖြည့်ဖို့ လူတွေမှာ လက်တွေ့ စမ်းသပ်မှုတွေလုပ်ဆောင်ရာမှာ ပိုပြီး ပမာဏသေးငယ်တဲ့ စမ်းသပ်မှုတွေကို ခွင့်ပြုဖို့ နိုင်ငံအများအပြားရဲ့ ကျန်းမာရေး အရာရှိတွေက သဘောတူခဲ့ကြပါတယ်။

အဲဒီ သဘောတူညီမှုမှာ အမေရိကန်ပြည်ထောင်စုနဲ့ ဥရောပ သမဂ္ဂ (EU) နိုင်ငံတွေ အပါအဝင် နိုင်ငံနဲ့ နယ်မြေ ၃၀ လောက် ပါဝင်တယ်လို့ ဂျပန် ကျန်းမာရေး ဝန်ကြီးဌာနက ဆိုပါတယ်။
ဒီ သဘောတူညီချက်မှာ ကိုရိုနာဗိုင်းရပ်စ် ကာကွယ်ဆေး တီထွင်သူတွေအနေနဲ့ လူထောင်ဂဏန်းပါဝင်တဲ့ အုပ်စုတွေမှာ လက်တွေ့စမ်းသပ်မှုတွေ လုပ်ဆောင်တာကို ခွင့်ပြုမှာ ဖြစ်ပါတယ်။ လက်ရှိအနေအထားမှာ နောက်ဆုံးအဆင့် လက်တွေ့စမ်းသပ်မှုအတွက် ပမာဏဟာ လူသောင်းနဲ့ချီပါဝင်ရမယ်လို့ သတ်မှတ်ထားတာဖြစ်ပါတယ်။
အုပ်စုတစ်စုကို စမ်းသပ်အဆင့် ကာကွယ်ဆေးပေးပြီး နောက်အုပ်စုတစ်စုကို အသွင်ဆောင်ထားတဲ့ တခြားဆေးပေးတဲ့ပုံစံနဲ့ လုပ်ဆောင်တဲ့ သမားရိုးကျ လက်တွေ့စမ်းသပ်မှုတွေအတွက် အလွန်တရာ များပြားတဲ့ စေတနာ့ဝန်ထမ်းတွေ လိုအပ်ပါတယ်။ အဲဒီ အုပ်စုနှစ်ခုလုံးက အချက်အလက်တွေကို နှိုင်းယှဉ်ပြီး အဆိုပြုထားတဲ့ ကာကွယ်ဆေးရဲ့ ထိရောက်မှုနဲ့ ဘေးကင်းစိတ်ချရမှုတွေကို ဆုံးဖြတ်ပါတယ်။
ဒါပေမဲ့ အခုအချိန်မှာ နိုင်ငံအများအပြားမှာ ကာကွယ်ဆေးထိုးပြီးတဲ့ လူဦးရေ အချိုးအစား သိသိသာသာ တိုးလာနေတာကြောင့် ထုတ်လုပ်သူတွေဟာ ကာကွယ်ဆေးမထိုးရသေးတဲ့ စေတနာ့ဝန်ထမ်းအရေအတွက် ကျဆင်းနေတဲ့ အနေအထားကို ရင်ဆိုင်နေရပါတယ်။
အခု နည်းသစ်မှာ အဆိုပြုထားတဲ့ ကာကွယ်ဆေးရဲ့ ထိရောက်မှုကို ဒီဆေးကို ထိုးပြီးတဲ့နောက် ဗိုင်းရပ်စ်ကို ချိုးနှိမ်တဲ့ ချေဖျက် ပဋိပစ္စည်း (neutralizing antibody) တွေ တိုးလာတဲ့အဆင့်ကို စစ်ဆေး အတည်ပြုမှာ ဖြစ်ပါတယ်။
ဒီသဘောတူညီချက်နဲ့ ပတ်သက်ပြီး ဂျပန် ကျန်းမာရေး ဝန်ကြီးဌာနက ပြည်တွင်းက ကာကွယ်ဆေးထုတ်လုပ်သူတွေကို အကြောင်းကြားခဲ့ပါတယ်။ ဒီနည်းသစ်ဟာ ပြည်တွင်းက ထုတ်လုပ်သူတွေ ကာကွယ်ဆေး တီထွင်ထုတ်လုပ်ဖို့ ပိုမိုလွယ်ကူစေမယ်လို့ မျှော်လင့်ရကြောင်း ဝန်ကြီးဌာန အရာရှိတွေက ဆိုပါတယ်။