စစ်တမ်းအရ COVID-19 အချက်အလက်တွေ နိုင်ငံခြားဘာသာစကားနဲ့ မလုံလောက်

စစ်တမ်းတစ်ခုအရ ဂျပန်မှာ နေထိုင်တဲ့ နိုင်ငံခြားသား အများအပြားဟာ ဒေသန္တရ အုပ်ချုပ်ရေးအဖွဲ့တွေက ဂျပန်လို ဖြန့်ဝေတဲ့ COVID-19 ဆိုင်ရာ သတင်းအချက်အလက်တွေကို အပြည့်အဝ နားလည်တာမျိုး မရှိဘဲ လူမှုကွန်ရက်နဲ့ အသိမိတ်ဆွေတွေဆီကနေ သတင်းအချက်အလက် ရယူနေတာကို တွေ့ရှိရပါတယ်။

နိုင်ငံခြားသား အများအပြား နေထိုင်တဲ့ နိုင်ငံတစ်ဝန်း မြို့ကြီးမြို့ငယ် ၁၃ခု ပါဝင်တဲ့ အဖွဲ့တစ်ဖွဲ့က အဲဒီ စစ်တမ်းကို ကောက်ယူခဲ့တာ ဖြစ်ပါတယ်။ ဂျပန်စာသင်တန်း၊ ဒေသန္တရ အုပ်ချုပ်ရေးအဖွဲ့ အဆောက်အအုံနဲ့ အင်တာနက်ပေါ်မှာ ပြီးခဲ့တဲ့ နှစ် အောက်တိုဘာလကနေ နိုဝင်ဘာလအထိ စစ်တမ်းကောက်ယူခဲ့ရာ ဖြေဆိုသူ ၁,၂၂၀ ရှိခဲ့ပါတယ်။
အသုံးဝင်ဆုံး သတင်းအချက်အလက်တွေကို ဘယ်ကနေ ရသလဲဆိုတဲ့ မေးခွန်းအပေါ် ဖြေဆိုသူ ၇၀၄ဦးက Facebook လို့ ဖြေခဲ့ပါတယ်။ အဲဒီ စစ်တမ်းမှာ အဖြေတစ်ခုမက ဖြေဆိုခွင့်ပြုထားပါတယ်။ ၅၀၉ဦးကတော့ ရုပ်မြင်သံကြား၊ ၄၉၃ဦးက ဂျပန်က သူငယ်ချင်းနဲ့ အသိမိတ်ဆွေတွေလို့ ဖြေဆိုခဲ့ပါတယ်။ ၃၆၄ဦးက ဗဟိုအစိုးရနဲ့ ဒေသန္တရ အုပ်ချုပ်ရေးအဖွဲ့တွေရဲ့ အင်တာနက်စာမျက်နှာလို့ ဖြေဆိုခဲ့ပါတယ်။ တခြားအဖြေတွေထက် အင်တာနက်စာမျက်နှာလို့ ဖြေဆိုတဲ့သူ နည်းရတဲ့ အကြောင်းရင်းက အဲဒီမှာ သတင်းအချက်အလက်တွေကို ဂျပန်လိုပဲ ရေးထားပြီး နိုင်ငံခြားသားတွေက နားမလည်တဲ့အတွက်ကြောင့် ဖြစ်ပါတယ်။
အလိုအပ်ဆုံးဖြစ်ပေမဲ့ မရရှိနိုင်ခဲ့တဲ့ သတင်းအချက်အလက်တွေက ဘာလဲ ဆိုတဲ့ မေးခွန်းနဲ့ပတ်သက်ပြီး ဖြေဆိုသူ ၄၇၉ဦးက ကိုရိုနာဗိုင်းရပ်စ် ကူးစက်ခံရသူနဲ့ ဆိုင်တဲ့ သတင်းအချက်အလက်တွေလို့ ဆိုပါတယ်။ ၄၂၇ဦးကတော့ သူတို့မှာ ဗိုင်းရပ်စ်ကူးစက်ခံရတယ်လို့ သံသယဖြစ်ရင် ဘာလုပ်ရမလဲဆိုတာကို သိချင်တယ်လို့ ပြောပါတယ်။ ၃၅၉ဦးက ထောက်ပံ့ကြေးငွေနဲ့ တခြား တရားဝင် ငွေကြေးထောက်ပံ့မှု လုပ်ငန်းစဉ်တွေနဲ့ ဆိုင်တဲ့ သတင်းအချက်အလက်တွေ ဖြစ်တယ်လို့ ပြောပါတယ်။
စစ်တမ်းကောက်ယူခဲ့တဲ့ အဖွဲ့က ဘာသာစကား မျိုးစုံနဲ့ သတင်းအချက်အလက်တွေ ပေးနိုင်ရေး ကြိုးပမ်းမှုတွေကို တိုးမြှင့်ဆောင်ရွက်သွားမယ်ဆိုတာနဲ့ နိုင်ငံခြားသားတွေအတွက် ဂျပန်စာသင်တန်းတွေ တိုးချဲ့ဖွင့်လှစ်ဖို့ ဗဟိုအစိုးရကို တိုက်တွန်းသွားမယ်လို့ ပြောပါတယ်။