နိုင်ငံခြားသားတွေက ကိုရိုနာဗိုင်းရပ်စ်ဆိုင်ရာ သတင်းအချက်အလက်တွေကို မိခင်ဘာသာစကားနဲ့ အလိုရှိ

Shizuoka ခရိုင်မှာ ကောက်ခံတဲ့ စစ်တမ်းတစ်ခုအရ နိုင်ငံခြားသားတွေဟာ ကိုရိုနာဗိုင်းရပ်စ် ကူးစက်ခံရမှာကို စိုးရိမ်နေကြပြီး သတင်းအချက်အလက်တွေကို မိခင်ဘာသာစကားနဲ့ ရလိုကြောင်း တွေ့ရှိခဲ့ရပါတယ်။

ဂျပန်နိုင်ငံ အလယ်ပိုင်း Shizuoka ခရိုင်မှာနေထိုင်တဲ့ နိုင်ငံခြားသားတွေထဲက ရာခိုင်နှုန်းအများဆုံးဖြစ်တဲ့ ဘရာဇီး နဲ့ ဖိလစ်ပိုင် နိုင်ငံသားတွေကို သူတို့ရဲ့ နေ့စဉ်ဘဝ၊ အလုပ်အကိုင် စတာတွေနဲ့ ပတ်သက်ပြီး ၂၀၂၀ခုနှစ် ဇွန်လကတည်းက ၃လတစ်ကြိမ် စစ်တမ်းကောက်ယူခဲ့ပါတယ်။
ဒီဇင်ဘာလမှာ ဖြေဆိုခဲ့သူ ၁၇၄ဦးထဲက ၈၁ ရာခိုင်နှုန်းဟာ သူတို့ကိုယ်တိုင် နဲ့ မိသားစုဝင်တွေ ရောဂါပိုးကူးစက်ခံရမှာကို စိုးရိမ်ကြောင်း ပြောခဲ့ကြပါတယ်။ အလုပ်အကိုင်နဲ့ ပတ်သက်ပြီး ဖြေဆိုသူတွေရဲ့ ၂၅ရာခိုင်နှုန်းက သူတို့ရဲ့ဝင်ငွေတွေ ကျဆင်းခဲ့ရတယ်လို့ ဖြေကြားခဲ့ပြီး ၁၄ရာခိုင်နှုန်းကတော့ အလုပ်လက်မဲ့ ဖြစ်ခဲ့ရတယ်လို့ ဖြေခဲ့ကြတာကြောင့် စီးပွားရေးအခြေအနေဆိုးရွားနေကြောင်း ထင်ဟပ်နေပါတယ်။
အဲဒီလို စိုးရိမ်နေကြတဲ့အကြား အစိုးရဆီက ဘယ်လိုအထောက်အပံ့မျိုးတွေ ရယူလိုသလဲဆိုတဲ့မေးခွန်းကို မေးမြန်းရာမှာ ၆၉ ရာခိုင်နှုန်းက မိခင်ဘာသာစကားနဲ့ ဆက်သွယ်ပြောဆိုနိုင်တဲ့ ဝန်ဆောင်မှုတွေပေးတဲ့ ဆေးရုံဆေးခန်းတွေကို သိလိုကြောင်းပြောခဲ့ကြပါတယ်။ ၆၄ရာခိုင်နှုန်းက ရောဂါကူးစက်မှုတွေကို ကာကွယ်တဲ့နည်းလမ်းတွေနဲ့ ပတ်သက်တဲ့ သတင်းအချက်အလက်တွေကို မိခင်ဘာသာစကားနဲ့ ရယူလိုကြောင်း ပြောခဲ့ကြပါတယ်။
ခရိုင်အရာရှိတွေက နိုင်ငံခြားသားနေထိုင်သူတွေရဲ့ လူမှုအသိုက်အဝန်းတွေနဲ့ Facebook ပေါ်မှာ သတင်းအချက်အလက်တွေကို လွယ်ကူတဲ့ ဂျပန်ဘာသာစကား၊ ပေါ်တူဂီဘာသာစကား၊ တခြားဘာသာစကား၂မျိုးတို့နဲ့ တိုးမြှင့်ပေးသွားမယ်လို့ ပြောပါတယ်။