“စိတ်ဖျော်ဖြေမှုပေးတဲ့အမျိုးသမီးတွေ”လို့ဆိုတဲ့သူတွေကို လျော်ကြေးပေးရန် တောင်ကိုရီးယားတရားရုံးက ဂျပန်အပေါ်စီရင်ချက်ချ

စစ်ကာလအတွင်း “စိတ်ဖျော်ဖြေမှုပေးတဲ့အမျိုးသမီးတွေ”လို့ ရည်ညွှန်းသုံးစွဲခံရတဲ့အုပ်စုတစ်စုကို ဂျပန်အစိုးရအနေနဲ့ ထိခိုက်နစ်နာကြေးပေးဖို့ တောင်ကိုရီးယားတရားရုံးတစ်ရုံးက အမိန့်ချလိုက်ပါတယ်။

ဂျပန်အစိုးရကတော့ အဲဒီဆုံးဖြတ်ချက်ဟာ အင်မတန်မှကို စိတ်မကောင်းစရာကောင်းပြီး ဘယ်တော့မှလက်မခံနိုင်ဘူးလို့ ဆိုကာ တောင်ကိုရီးယားဘက်ကို ပြင်းပြင်းထန်ထန် ကန့်ကွက်လိုက်ပါတယ်။
ဆိုးလ် ဗဟိုခရိုင်တရားရုံးရဲ့ သောကြာနေ့က စီရင်ချက်ထဲမှာ ဂျပန်အစိုးရဟာ တိုင်ကြားသူ ၁၂ ဦးကို တစ်ဦးလျှင် အမေရိကန်ဒေါ်လာ ၉၁၀၀၀ ခန့် ဒါမှမဟုတ် အဲဒီအုပ်စုတစ်စုလုံး အတွက် ဒေါ်လာ ၁.၁ သန်း ပေးရမယ်လို့ ဆိုထားပါတယ်။
အဲဒီတောင်ကိုရီးယားအမျိုးသမီး ၁၂ ဦးဟာ ၂၀၁၃ ခုနှစ်က လျော်ကြေးရလိုမှုနဲ့ တရားရုံးရဲ့ ကြားဝင်ဆောင်ရွက်မှုရဖို့ လျှောက်ထားခဲ့ကြပါတယ်။ အဲဒီနောက်မှာ သူတို့ဟာ တရားစွဲဆိုခဲ့ပြီး မနှစ်က ဧပြီလမှာ ပထမဦးဆုံး ကြားနာမှုပြုလုပ်ခဲ့ပါတယ်။ အဲဒီတရားရုံးဆိုင်ရာ လုပ်ငန်းစဉ်တွေကို ဂျပန်အစိုးရဘက်က တက်ရောက်ခဲ့ခြင်း မရှိပါဘူး။ အဲဒီတရားစွဲဆိုမှုကို အချုပ်အခြာ အာဏာပိုင်မှုအရ အပြစ်မှကင်းလွတ်ခွင့်ရှိတယ်ဆိုတဲ့အခြေခံနဲ့ ပယ်ချသင့်တယ် ဆိုတဲ့ ရပ်တည်ချက်ကို ဂျပန်အစိုးရက စွဲကိုင်ထား ပါတယ်။ အဲဒါဟာ နိုင်ငံတကာဥပဒေအရ နိုင်ငံ‌တော်ဟာ နိုင်ငံခြား တိုင်းပြည်တစ်ပြည်က အရပ်ဘက်ဆိုင်ရာတရားရုံးရဲ့ စီရင်ဆုံးဖြတ်ခြင်းကနေ ကင်းလွတ်ခွင့်ရှိတယ်ဆိုတဲ့ အယူအဆဖြစ်ပါတယ်။
သောကြာနေ့က ဆုံးဖြတ်ချက်ထဲမှာ တရားရုံးဟာ အဲဒီအမှုနဲ့ပတ်သက်ပြီး အချုပ်အခြာအာဏာပိုင်မှုအရ အပြစ်ကင်းလွတ်ခွင့်ဆိုတာကို‌ ဆောင်ရွက်ထားတာမျိုး မရှိပါဘူး။ စစ်အတွင်းက အဲဒီလုပ်ရပ်တွေဟာ လူမဆန်တဲ့ ရာဇဝတ်မှုတွေဖြစ်ပြီး စနစ်တကျနဲ့ စီမံပြီး ဆောင်ရွက်တာ ဖြစ်တယ်လို့ မှတ်ချက်ပြုထား ပါတယ်။
၁၉၆၅ ခုနှစ်မှာ နှစ်နိုင်ငံအကြား ပုံမှန်ဆက်ဆံရေး ပြန်လည်ထူထောင်ခဲ့ချိန်မှာ လျော်ကြေးဆိုင်ရာကိစ္စအားလုံးကို ဖြေရှင်းပြီးဖြစ်တယ်ဆိုတာကို ဂျပန်က ကိုင်စွဲထားပါတယ်။
ဂျပန်အစိုးရအဖွဲ့အတွင်းဝန်ချုပ် Kato Katsunobu က စစ်ကာလအတွင်း လျော်ကြေးဆိုင်ရာကိစ္စအားလုံးကို ဂျပန်နဲ့တောင်ကိုရီးယားတို့ နှစ်နိုင်ငံအပြန်အလှန် ပုံမှန်ဆက်ဆံရေး ဖြစ်လာခဲ့တဲ့ ၁၉၆၅ ခုနှစ်မှာ အပြည့်အဝနဲ့ အပြီးသတ်ဖြေရှင်းပြီး သွားပြီလို့ ဆိုပါတယ်။ အဲဒီကိစ္စတွေနဲ့ပတ်သက်တဲ့ အငြင်းပွားမှုတွေကို အပြီးသတ်နဲ့ ပြန်မပြင်ဆင်နိုင်တဲ့ အနေအထားနဲ့ ဖြေရှင်းပြီးသွားပြီဆိုတာကို ၂၀၁၅ ခုနှစ် နှစ်နိုင်ငံသဘောတူညီချက် တစ်ခုမှာ အစိုးရနှစ်ရပ်စလုံးက အတည်ပြုခဲ့တယ်လို့လည်း မစ္စတာ Kato က ဆိုပါတယ်။
သူက နိုင်ငံတကာဥပဒေကိုချိုးဖောက်ရာရောက်တဲ့ ရပ်တည်ချက်ကို မှန်မှန်ကန်ကန်ဖြစ်အောင် ပြန်လည်ပြင်ဆင်ဖို့ အတွက် သင့်လျော်တဲ့ ဆောင်ရွက်ချက်တွေကို လုပ်ပါဆိုပြီး တောင်ကိုရီးယားအစိုးရကို ပြင်းပြင်းထန်ထန် တောင်းဆိုခဲ့ ပါတယ်။