ဂျပန်မှာ အထက်တန်းကျောင်းဝင်ခွင့်စာမေးပွဲ ဖြစ်ဆိုမယ့် နိုင်ငံခြားသားတွေကို ပံ့ပိုးကူညီမယ်

ဂျပန်နိုင်ငံတစ်ဝန်းက အစိုးရအထက်တန်းကျောင်းတွေအနေနဲ့ သူတို့ရဲ့ ဝင်ခွင့်စာမေးပွဲကို ဖြေဆိုတဲ့ နိုင်ငံခြားသား ကျောင်းသူကျောင်းသားတွေအတွက် အထူးသတ်မှတ်ချက်တွေ ကျင့်သုံးဖို့ ဂျပန်ပညာရေးဝန်ကြီးဌာနက ညွှန်ကြားလိုက်ပါတယ်။

ဒေသန္တရ ပညာရေးဘုတ်အဖွဲ့တွေအတွက် ထုတ်ပြန်ထားတဲ့ ညွှန်ကြားစာမှာ ဝန်ကြီးဌာနဟာ အထက်တန်းကျောင်းတွေကို လျှောက်ထားတဲ့ နိုင်ငံခြားသားတွေကို ပံ့ပိုးကူညီဖို့နဲ့ ဆိုင်တဲ့ အချက်အလက်တွေကို စုစည်းတင်ပြထားပါတယ်။

နိုင်ငံခြားသားတွေကို ဂျပန်လူမှုအဖွဲ့အစည်းမှာ မှီခိုမှုကင်းမဲ့တဲ့ နိုင်ငံသားတွေ ဖြစ်လာစေဖို့အတွက် သင့်လျော်တဲ့ အထက်တန်းပညာရေး ပေးအပ်ဖို့ အရေးကြီးတယ်လို့ ဝန်ကြီးဌာနက ဆိုပါတယ်။

အဲဒီလို ကျောင်းသူကျောင်းသားတွေကို လက်ခံတဲ့ အရေအတွက်ကို အထူးသတ်မှတ်ထားဖို့ အဲဒီစာထဲမှာ တောင်းဆိုထားပါတယ်။ သူတို့ကို စာမေးပွဲအတွင်း အဘိဓာန်သုံးခွင့်ပြုဖို့နဲ့ စာမေးပွဲမေးခွန်းလွှာတွေကို ဖတ်ရှုရာမှာ အထောက်အကူပြုစေဖို့အတွက် ခက်ခဲတဲ့ ခန်းဂျီးစကားလုံးတွေရဲ့ အသံထွက်ကို သိအောင် ဘေးမှာ ဟီရာ့ဂါ့နာ အက္ခရာတွေကိုပါ ထည့်ရေးပေးဖို့ တောင်းဆိုထားပါတယ်။

ပညာရေးဝန်ကြီးဌာနက ကောက်ယူခဲ့တဲ့ စစ်တမ်းအရ ၂၀၂၁ ခုနှစ်မှာ ကလေး ၄၇,၀၀၀ ကျော်ဟာ ဂျပန်ဘာသာစကားအရည်အချင်း မလုံလောက်ဘူးလို့ သိရပါတယ်။ ဒါဟာ ၁၀ နှစ်တာကာလအတွင်း ၈၀ ရာခိုင်နှုန်းတိုးလာခဲ့တာ ဖြစ်ပါတယ်။

နိုင်ငံခြားသားတွေကို လက်ခံတဲ့ အရေအတွက်ကို အထူးသတ်မှတ်ထားတဲ့ ကျောင်း ဒါမှမဟုတ် အဲဒီလို အစီအမံတွေ ကျင့်သုံးနေတဲ့ ကျောင်းအရေအတွက်ဟာ သိပ်မရှိတာကြောင့် အခုလို ညွှန်ကြားစာကို ထုတ်ပြန်ခဲ့တာ ဖြစ်တယ်လို့ တာဝန်ရှိသူတွေက ဆိုပါတယ်။