ခရီးသည်တွေရဲ့ နှောင့်ယှက်မှုကို တန်ပြန်ဖို့ ANA ၊ JAL က မူဝါဒတွေ ချမှတ်

All Nippon Airways (ANA) နဲ့ Japan Airlines (JAL) ကုမ္ပဏီတို့က ခရီးသည်တွေရဲ့ နှောင့်ယှက်မှုနဲ့ စော်ကားမှုတွေကို တန်ပြန်ဖို့ လမ်းညွှန်ချက်အသစ်တွေကို ပူးတွဲထုတ်ပြန်ခဲ့ပါတယ်။ ဝန်ထမ်းတွေကို အကာအကွယ်ပေးနိုင်ဖို့အတွက် လက်သင့်မခံနိုင်တဲ့အပြုအမူ ၉ မျိုးကို ခွဲခြားထားတယ်လို့ ကုမ္ပဏီတွေက ဆိုပါတယ်။

ဂျပန်နိုင်ငံရဲ့ အကြီးဆုံး လေကြောင်းလိုင်း ၂ ခုက လမ်းညွှန်ချက်တွေကို သောကြာနေ့က ထုတ်ပြန်ခဲ့ပါတယ်။ နှောင့်ယှက်မှု ၉ မျိုးထဲမှာ ကိုယ်ထိလက်ရောက် စော်ကားမှု၊ နှုတ်နဲ့ မထော်မနန်း ပြောတာ နဲ့ ကျိုးကြောင်းဆီလျော်မှုမရှိဘဲ တောင်းဆိုမှုတွေ ပါဝင်ပါတယ်။ အဲဒီအပြုအမူတွေက ဝန်ထမ်းတွေရဲ့ လူ့အခွင့်အရေးကို ချိုးဖောက်ပြီး အလုပ်မလုပ်နိုင်အောင် ဟန့်တားမှုဖြစ်စေတယ်လို့ ကုမ္ပဏီတွေရဲ့ တာဝန်ရှိသူ‌တွေက ဆိုပါတယ်။

၀န်ထမ်းတချို့ဟာ အလွန်အမင်းစိတ်ဖိစီးမှုတွေ ကြုံတွေ့ရပြီး၊ ဆေးခွင့်ရက်ရှည်ယူရတာ ဒါမှမဟုတ် အလုပ်ထွက်တဲ့အထိဖြစ်တာတွေရှိကြောင်း ANA က တာဝန်ရှိသူတစ်ဦးဖြစ်တဲ့ Miyashita Yoshiko က ပြောပါတယ်။

နှောင့်ယှက်ခံရကြောင်းတိုင်ကြားချက်တွေကို ရဲတပ်ဖွဲ့ဆီ အကြောင်းကြားတာအပါအဝင် တင်းတင်းကျပ်ကျပ် တုံ့ပြန်သွားမယ်လို့ ANA နဲ့ JAL က တာဝန်ရှိသူတွေက ဆိုပါတယ်။

ပြီးခဲ့တဲ့ ဘဏ္ဍာနှစ်အတွင်း ခရီးသွားဖောက်သည်တွေရဲ့ဝန်ထမ်းနှောင့်ယှက်မှုပတ်သက်တဲ့ တိုင်ကြားချက်ပေါင်း ၆၀၀ လောက်ကို ရရှိခဲ့တယ်လို့ ကုမ္ပဏီတွေက ထည့်သွင်းပြောခဲ့ပါတယ်။

ခရီးသွားဖောက်သည်တွေရဲ့ နှောင့်ယှက်မှုကို ကိုင်တွယ်နိုင်ဖို့ တခြားလေကြောင်းလိုင်းတွေကလည်း လမ်းညွှန်ချက်တွေကို လက်ခံချမှတ်ပြီး၊ လေကြောင်းလိုင်းလုပ်ငန်းကြီးတစ်ခုလုံးရဲ့အားထုတ်မှုကနေ ဖြေရှင်းနိုင်မယ်လို့ သူတို့ ကုမ္ပဏီတွေက မျှော်လင့်ကြောင်း JAL က တာဝန်ရှိသူတစ်ဦးက ပြောခဲ့ပါတယ်။