တိုကျိုမြောက်ဘက်က ရှင်တိုနတ်ကွန်းရဲ့ ခေါင်မိုးပေါ်က ကြေးနီပြားတွေ ခိုးယူခံရ

တိုကျိုမြောက်ဘက် Tochigi ခရိုင် Ashikaga မြို့က ရှင်တိုနတ်ကွန်းတစ်ခုရဲ့ ခေါင်မိုးပေါ်က ကြေးနီပြားတွေ ပျောက်ဆုံးနေတယ်လို့ သိရပါတယ်။

မြို့က ယဉ်ကျေးမှုအမွေအနှစ်အဖြစ် သတ်မှတ်ထားတဲ့ ပင်မခန်းမဆောင်ရဲ့ ခေါင်မိုးပေါ်က ကြေးနီပြားအချပ်ပေါင်း ၂၀၀ လောက်ဟာ ပျောက်ဆုံးနေခဲ့တယ်လို့ Kabasaki Hachimangu နတ်ကွန်းက ဘုန်းတော်ကြီးက ရဲတပ်ဖွဲ့ကို တနင်္လာနေ့မနက်မှာ အကြောင်းကြားခဲ့ပါတယ်။

ပင်မခန်းမဆောင်ကို ဝန်းရံထားတဲ့ နံရံပေါ်က ကြေးနီပြား ၇၀ လောက်ဟာလည်း ပျောက်ဆုံးနေပါတယ်။

ကြေးနီပြားတွေဟာ တစ်ချပ်ကို အလျား ၁၄ စင်တီမီတာနဲ့ အနံ ၅၆ စင်တီမီတာလောက် ရှိတယ်လို့ ရဲတွေက ပြောပါတယ်။ ပျောက်ဆုံးသွားတဲ့ ကြေးနီပြားတန်ဖိုးဟာ ယန်း ၄ သန်းလောက် တစ်နည်းအားဖြင့် အမေရိကန်ဒေါ်လာ ၂၅,၅၀၀ လောက် ရှိပါတယ်။

ကြေးနီပြားတွေဟာ နတ်ကွန်းတာဝန်ရှိသူက တနင်္ဂနွေနေ့ ညနေ ၆ နာရီဝန်းကျင်လောက်မှာ လာရောက်စစ်ဆေးကြည့်ရှုခဲ့ချိန်ကနေ တနင်္လာနေ့မနက်ပိုင်းအတွင်း ခိုးယူခံခဲ့ရတာ ဖြစ်တယ်လို့ ယူဆရပါတယ်။

တစ်စုံတစ်ယောက်က နတ်ကွန်းခေါင်မိုးပေါ် ခြေထောက်နဲ့ နင်းပြီး ကြေးနီပြားတွေကို ခွာချသွားတာဟာ လက်သင့်ခံနိုင်ဖွယ် မရှိဘူးလို့ ဘုန်းတော်ကြီး Sagehashi Teruyuki က ပြောကြားခဲ့ပါတယ်။