နိုင်ငံခြားကျောင်းသားတွေရဲ့ ဂျပန်ဘာသာစကား စွမ်းရည် တိုးတက်စေဖို့ စာမေးပွဲတွေကို တိုကျိုမြို့ စီစဉ်နေ

တိုကျိုပညာရေးဘုတ်အဖွဲ့က နိုင်ငံခြားကျောင်းသားတွေရဲ့ ဘာသာစကားစွမ်းရည် တိုးတက်စေရေးအတွက် ဂျပန်ဘာသာစကား နားလည်မှုဆိုင်ရာ စာမေးပွဲတွေကို လုပ်ဆောင်ပေးမယ်လို့ ပြောပါတယ်။

ပညာရေးဘုတ်အဖွဲ့တာဝန်ရှိသူတွေက တိုကျိုမြို့တော် အုပ်ချုပ်ရေးအဖွဲ့က စီမံခန့်ခွဲနေတဲ့ အထက်တန်းကျောင်းအားလုံးနဲ့ တချို့ အစိုးရမူလတန်းနဲ့ အလယ်တန်းကျောင်းတွေမှာ အဲဒီစာမေးပွဲတွေကို ကျင်းပဖို့ ဆုံးဖြတ်ခဲ့ပါတယ်။

ဒီစာမေးပွဲတွေဟာ ဝေါဟာရနဲ့ သဒ္ဒါတွေအပြင် နားထောင်မှုနဲ့ ဖတ်ရှုမှုဆိုင်ရာ ကျောင်းသားတွေရဲ့ နားလည်နိုင်စွမ်းတွေကို အကဲဖြတ်မှာဖြစ်တယ်လို့ တာဝန်ရှိသူတွေက ဆိုပါတယ်။ အထက်တန်းကျောင်းသားတွေအနေနဲ့ ဒီစာမေးပွဲတွေကို အွန်လိုင်းက ဖြေဆိုမှာဖြစ်ပြီး မူလတန်းနဲ့ အလယ်တန်း ကျောင်းသားတွေကတော့ စာမေးပွဲခန်းမှာကိုယ်တိုင် ဖြေဆိုရမှာဖြစ်တယ်လို့ သူတို့က ပြောပါတယ်။

တာဝန်ရှိသူတွေက နိုင်ငံခြားနောက်ခံရှိတဲ့ ကလေးတွေရဲ့ ဘာသာစကားကျွမ်းကျင်မှု တိုးတက်လာစေဖို့ ဂျပန်စာ ဖြည့်စွက်သင်ခန်းစာတွေ အပါအဝင် တစ်ဦးချင်းအလိုက် အစီအစဥ်တွေကို ရေးဆွဲပေးမှာ ဖြစ်ပါတယ်။

ကိုရိုနာဗိုင်းရပ်စ်ဆိုင်ရာ ပြည်ဝင်ခွင့် ကန့်သတ်ချက်တွေ ဖြေလျှော့လိုက်ချိန်ကစပြီး ဂျပန်ဘာသာစကား သင်ကြားရေး လိုအပ်နေတဲ့ နိုင်ငံခြားကျောင်းသား အရေအတွက်ဟာ တိုကျိုက အစိုးရကျောင်းတွေမှာ တိုးလာနေတယ်လို့ သူတို့က ပြောပါတယ်။ ပြီးခဲ့တဲ့ မေလအထိ အဲဒီအရေအတွက်ဟာ ၅,၄၀၀ ဝန်းကျင်ရှိပြီး ဒီမတိုင်ခင်နှစ်ကထက် တစ်ဆခွဲ တိုးလာတယ်လို့ သူတို့က ဆိုပါတယ်။

ဘာသာစကားဆိုင်ရာ အဟန့်အတားတွေဟာ တစ်ခါတစ်ရံမှာ အနိုင်ကျင့်မှုတွေဆီကို ဦးတည်စေတတ်ပြီး ကျောင်းသားတွေရဲ့ ကျောင်းသားဘဝ ပိုမိုပျော်ရွှင်စရာဖြစ်စေဖို့အတွက် သူတို့ရဲ့အားနည်းချက်တွေကို တိတိကျကျ ဖော်ထုတ်သွားချင်တယ်လို့ တာဝန်ရှိသူတစ်ဦးက ပြောပါတယ်။