မြင့်မားတဲ့စျေးနှုန်းတွေ ကျဆင်းစေဖို့ ကြိုးပမ်းတဲ့ သူတို့ရဲ့ စီမံချက်ကို အမေရိကန်ဗဟိုဘဏ် အရာရှိတွေ ဆက်လက်လုပ်ဆောင်နေပါတယ်။ သူတို့အနေနဲ့ အောင်မြင်မှုတချို့ ရရှိခဲ့ပေမဲ့ နောက်ပိုင်းမှာ ငွေကြေးဖောင်းပွမှုနဲ့ပတ်သက်တဲ့ သူတို့ရဲ့တိုးတက်မှုတွေ တုံ့ဆိုင်းသွားခဲ့ပါတယ်။ အခုအခါ သူတို့က အတိုးနှုန်းကို မပြောင်းလဲဘဲထားဖို့ ဆုံးဖြတ်လိုက်ပါတယ်။
အမေရိကန်ဗဟိုဘဏ် မူဝါဒချမှတ်သူတွေဟာ အတိုးနှုန်းကို နှစ် ၂၀ ကျော်အတွင်း အမြင့်ဆုံးအဆင့်ကို မြှင့်တင်လာခဲ့ပါတယ်။ ဒါပေမဲ့ ဗုဒ္ဓဟူးနေ့က အစည်းဝေးမှာတော့ ၆ ကြိမ်ဆက်တိုက် အတိုးနှုန်းမြှင့်တင်မှုကို မလုပ်ဖို့ သူတို့က ဆုံးဖြတ်ခဲ့ပါတယ်။
မူဝါဒချမှတ်သူတွေက စျေးနှုန်းမြင့်တက်မှုမှာ "နောက်ထပ် ဖြစ်ပေါ်မှု မရှိတဲ့အနေအထား" ကို တွေ့နေရပြီး ငွေကြေးဖောင်းပွမှုဟာ သူတို့ရဲ့ပစ်မှတ်ဖြစ်တဲ့ ၂ ရာခိုင်နှုန်းဆီကို "ရေရှည်တည်တံ့တဲ့အနေအထား" နဲ့ ရွေ့လျားလာနေတယ်လို့ သူတို့ပိုပြီးခိုင်ခိုင်မာမာယုံကြည်ဖို့လိုအပ်နေကြောင်း ဆိုထားတဲ့ကြေညာချက်တစ်စောင်ကို ထုတ်ပြန်ခဲ့ပါတယ်။
အစည်းအဝေးအပြီး ဝါရှင်တန်မှာ ပြုလုပ်တဲ့ သတင်းစာရှင်းလင်းပွဲမှာ ဗဟိုဘဏ်ဥက္ကဋ္ဌ Jerome Powell က "အဲဒီလိုယုံကြည်မှုရလာတဲ့အခါ အတိုးနှုန်းလျှော့ချမှု အတိုင်းအတာတစ်ခုအထိ ဖြစ်လာမယ်လို့ပြောနိုင်ပေမဲ့ ဒါကဘယ်အချိန်ဖြစ်မယ်ဆိုတာ အတိအကျ မသိဘူး" လို့ ဆိုပါတယ်။ သူက စျေးနှုန်းတွေ ကျလာစေမလားဆိုတာ မသေချာဘူးလို့လည်း ဆက်လက်ပြောကြားခဲ့ပါတယ်။