အခုတစ်ခေါက်မှာတော့ ကျောင်းမတက်နိုင်တဲ့ နိုင်ငံခြားသားကလေး ၆၂ ရာခိုင်နှုန်းရှိပြီး အများဆုံးဖြစ်နေတဲ့ တိုကျိုမြို့ပြဧရိယာရဲ့ အခြေအနေကို စုစည်းတင်ပြထားပါတယ်။
ဂျပန်မှာနေထိုင်တဲ့ နိုင်ငံခြားသား ကလေးတွေ ကျောင်းတက်ဖို့အတွက် လိုအပ်တဲ့အကူအညီတွေကို ဘယ်နေရာမှာ ရနိုင်တယ်ဆိုတာကို မိတ်ဆက်ပေးပါမယ်။
၂၀၂၂ ခုနှစ် မေလအထိတိုကျိုမှာ ကျောင်းမတတ်နိုင်တဲ့ နိုင်ငံခြားသား ကလေးအရေအတွက် ၂,၇၄၈ ဦးရှိပြီး တစ်နိုင်ငံလုံးအတိုင်းအတာနဲ့ အများဆုံးဖြစ်ပါတယ်။
ဂျပန်နိုင်ငံက (公立小学校) လို့ခေါ်တဲ့ အစိုးရ မူလတန်းနဲ့ အလယ်တန်းကျောင်းတွေမှာ ကလေးတွေကို ကျောင်းအပ်နှံလိုတဲ့ နိုင်ငံခြားသားတွေဟာ ကိုယ်နေထိုင်ရာ မြို့နယ်၊ဒေသရဲ့ ဒေသန္တရအုပ်ချုပ်ရေးရုံးမှာ နေထိုင်တဲ့လိပ်စာနဲ့ အိမ်ထောင်စုစာရင်း သွင်းတဲ့အခါ တစ်ခါတည်းပဲ ရုံးထဲကဒေသန္တရပညာရေး ဘုတ်အဖွဲ့ ကောင်တာမှာ ကျောင်းအပ်ဖို့လိုအပ်တဲ့ စာရွက်စာတမ်းတွေ လုပ်ဆောင်နိုင်ပါတယ်။ အုပ်ချုပ်ရေးရုံးမှာ အိမ်ထောင်စုစာရင်းမသွင်းနိုင်သေးတာ ဒါမှမဟုတ် နေထိုင်သူအဖြစ် အိမ်ထောင်စုစာရင်းမသွင်းထားသူတွေအနေနဲ့ ကိုယ်အမှန်တကယ် နေထိုင်တဲ့မြို့နယ်က（教育委員会）လို့ခေါ်တဲ့ ဒေသန္တရပညာရေးဘုတ်အဖွဲ့နဲ့ တိုင်ပင်ဆွေးနွေးပါ။
ကျောင်းအပ်နှံဖို့အတွက် လုပ်ထုံးလုပ်နည်းအသေးစိတ်နဲ့ ဂျပန်ရဲ့ မသင်မနေရပညာရေးစနစ် အကြောင်းနဲ့ပတ်သက်ပြီး Tokyo Metropolitan Board of Education အင်တာနက်စာမျက်နှာမှာ ဘာသာစကား အမျိုး (၂၀) နဲ့ ရေးသားဖေါ်ပြပေးထားပါတယ်။
နိုင်ငံခြားသား ကလေးတွေ ကျောင်းအပ်နှံဖို့အတွက် တိုကျိုက Arakawa မြို့နယ်မှာ အခြေစိုက်တဲ့ NPO အဖွဲ့အစည်း Multicultural Center Tokyo（多文化共生センター東京） ဟာ ကူညီဆောင်ရွက်ပေးနေတဲ့ အဖွဲ့အစည်းတွေ တစ်ခု ဖြစ်ပါတယ်။
အဲဒီ စင်တာဟာ ကလေးကျောင်းအပ်နှံဖို့အတွက် တိုင်ပင်ဆွေးနွေးမှုတွေ၊ ပညာရေးဆိုင်ရာ အခက်အခဲတွေ၊ စိုးရိမ်ပူပန်နေတဲ့အကြောင်းအရာတွေကိုဆွေးနွေးတိုင်ပင်ပြီး ကူညီ ဖြေရှင်း ပေးပါတယ်။ တိုကျိုမြို့တော်ဧရိယာအတွင်းမှာ နေထိုင်တဲ့ နိုင်ငံခြားသားတွေအနေနဲ့ ဖုန်းနံပါတ် 03-6807-7937 ဆက်သွယ် မေးမြန်းပါ။
တိုကျိုကမြို့နယ်တွေအတွင်းမှာနေတဲ့ နိုင်ငံခြားသားကလေးတွေထဲက ကျောင်းမတက်နိုင်တဲ့အသေးစိတ်စာရင်းကတော့ Minato မြို့နယ်မှာ နိုင်ငံခြားသားကလေးအရေအတွက် ၄၃၂ ဦး နဲ့အများဆုံးဖြစ်ပြီး၊ Shibuya မြို့နယ်မှာ ၂၉၂ ဦးနဲ့ Shinjuku မြို့နယ်မှာ ၂၉၀ ဦး ရှိပါတယ်။ မိသားစုတွေဟာ ပြောင်းရွှေ့နေထိုင်လာပြီး သက်ဆိုင်ရာမြို့နယ်ရုံးတွေမှာ မှတ်ပုံတင်တာစတဲ့ လုပ်ဆောင်ဖို့လိုအပ်တာတွေကို လာလုပ်တဲ့အချိန်မှာ အဲဒီမြို့နယ် ၃ ခုရဲ့ အုပ်ချုပ်ရေးအဖွဲ့က အင်္ဂလိပ်စာ စတဲ့ နိုင်ငံခြားဘာသာစကားမျိုးစုံနဲ့ ရှင်းလင်းချက်တွေ ထုတ်ပေးပြီး သူတို့ရဲ့ကလေးတွေကို ကျောင်းအပ်ဖို့အတွက် အကြံပြုပါတယ်။ ဒါပေမဲ့ ဒီမြို့နယ်တွေအတွင်း မိသားစု အများစုက မကြာခဏ အပြောင်းအရွေ့ များတာကြောင့် မြို့နယ်အုပ်ချုပ်ရေးအဖွဲ့တွေဟာ နိုင်ငံခြားသားကလေးတွေ ကျောင်းတက်မတက်ဆိုတာကို အတိအကျ သိဖို့ခက်ခဲနေတယ်လို့ ဆိုပါတယ်။
Minato မြို့နယ် （教育委員会）ပညာရေးဘုတ်အဖွဲ့ရဲ့ ပြောကြားချက်အရ ကျောင်းအပ်နှံမှုနည်းတဲ့ နိုင်ငံခြားသားကလေးတွေထဲမှာ အများဆုံးက အမေရိကန်နိုင်ငံသားတွေဖြစ်ပြီး၊ တရုတ်နဲ့ တောင်ကိုရီးယားက ဒုတိယနဲ့ တတိယလိုက်ပါတယ်။
Minato မြို့နယ် ပညာရေးဘုတ်အဖွဲ့က ကျောင်းအပ်နှံတာနဲ့ ပတ်သက်ပြီး （教育委員会学務課）မှာနိုင်ငံခြားသားတွေကို အကြံပြုဆွေးနွေးပေးနေပါတယ်။ ရုံးခန်းကို တိုက်ရိုက်လာရောက်သူတွေအတွက် Computer tabletနဲ့ ဘာသာပြန်စက်ကို အသုံးပြုပြီး ဘာသာစကားမျိုးစုံနဲ့ ဆွေးနွေးပေးသလို ဖုန်းခေါ်မယ်ဆိုရင် ကြားကစကားပြန်အပါအဝင် သုံးဦးသုံးဖလှယ် ကလေးပညာရေးပိုင်းကို ဆွေးနွေးတဲ့ ဝန်ဆောင်မှုပေးပါတယ်။ ပညာရေးဘုတ်အဖွဲ့ရဲ့ ကျောင်းပညာရေးဆိုင်ရာဌာန（教育委員会学務課）ကို ဆက်သွယ်ပြီး တိုင်ပင်ဆွေးနွေးမယ်ဆိုရင် ဖုန်းနံပါတ် 03-3578-2111 ကိုခေါ်ဆိုပါ။ မြို့နယ်ရုံးက သက်ဆိုင်ရာ ပညာရေးဌာနကို ချိတ်ဆက်ပေးပါလိမ့်မယ်။
Shibuya မြို့နယ်ပညာရေးဘုတ်အဖွဲ့က ကျောင်းအပ်နှံမှုနည်းလာတဲ့ နိုင်ငံခြားကလေးတွေထဲမှာ တောင်ကိုရီးယားကအများဆုံးဖြစ်ပြီး၊ တရုတ်နဲ့ အမေရိကန်နိုင်ငံက ကလေးတွေက ဒုတိယနဲ့တတိယလိုက်တယ်လို့ ဆိုပါတယ်။ အဲဒီ ပညာရေးဘုတ်အဖွဲ့ရဲ့ ကျောင်းပညာရေးဆိုင်ရာဌာန（教育委員会学務課）က ကျောင်းအပ်နှံတာနဲ့ ပတ်သက်ပြီး ဆွေးနွေးတိုင်ပင်မှုတွေကို လက်ခံဆောင်ရွက်ပေးနေ ပါတယ်။ သူတို့က ဂျပန်၊ တရုတ်နဲ့ အင်္ဂလိပ်ဘာသာစကားတွေနဲ့ လူချင်းတွေ့ပြီး တိုက်ရိုက်လက်ခံဆွေးနွေးတာ ဒါမှမဟုတ် တယ်လီဖုန်းနဲ့ဆွေးနွေးတာ လို ဝန်ဆောင်မှုပေးပါတယ်။ တခြားဘာသာစကားနဲ့ အကူအညီ လိုအပ်သူတွေအတွက် သက်ဆိုင်ရာဘာသာပြန်တစ်ဦးကို မြို့နယ်အုပ်ချုပ်ရေးအဖွဲ့က စီစဉ်ပေးထားတယ်လို့ သိရပါတယ်။ Shibuya Ward Board of Education, School Affairs Section（教育委員会学務課） ကို ဆက်သွယ်ပြီး တိုင်ပင်ဆွေးနွေးနိုင်ပါတယ်။ ဖုန်းနံပါတ် 03-3463-1211 ကို ဆက်သွယ်နိုင်ပါတယ်။
Shinjuku မြို့နယ်မှာတော့ ကျောင်းအပ်နှံမှု လျော့နည်းလာတဲ့ နိုင်ငံခြားသားကလေးတွေက တရုတ်လူမျိုးက အများဆုံးဖြစ်ပြီး၊ တောင်ကိုရီးယားက ဒုတိယလိုက်ပါတယ်။ အဲဒီနောက် မြန်မာ၊ နီပေါနဲ့ ဗီယက်နမ် က ကလေးတွေကျောင်းမတက်ကြတာများပါတယ်။
Shinjuku Ward Board of Education၊ School Affairs Section（教育委員学校運営課） က တိုင်ပင်ဆွေးနွေးမှုတွေကို လက်ခံဆောင်ရွက်ပေးနေပြီး ဘာသာပြန်တဲ့ Computer tablet နဲ့ ဘာသာစကားမျိုးစုံဘာသာပြန်ပြီး ဆွေးနွေးဆောင်ရွက်ပေး နေပါတယ်။ ဖုန်းနံပါတ် 03-5273-3089 ကိုဖုန်းခေါ်ဆိုရင် ကျောင်းပညာရေးဆိုင်ရာဌာနကို ချိတ်ဆက်ပေးမှာ ဖြစ်ပါတယ်။

ဒီသတင်းအချက်အလက်တွေက ၂၀၂၃ ခုနှစ် အောက်တိုဘာလက ရရှိထားတဲ့ အချက်အလက်တွေ ဖြစ်ပါတယ်။

အခုတစ်ခေါက်မှာတော့ Kanagawa ခရိုင် မှာနေထိုင်တဲ့ နိုင်ငံခြားသား ကလေးတွေ ကျောင်းတက်ဖို့အတွက် လိုအပ်တဲ့ အကူအညီတွေကို ဘယ်နေရာမှာ ရနိုင်တယ်ဆိုတာကို မိတ်ဆက်ပေး ပါမယ်။
Kanagawa ခရိုင်ထဲက　ကျောင်းမတက်နိုင်တဲ့ ကလေးတွေရဲ့ ၉၆.၇ ရာခိုင်နှုန်းက Yokohamaမြို့ နဲ့ Kawasaki မြို့တွေက ဖြစ်ပါတယ်။
Yokohama မြို့မှာ နိုင်ငံခြားသားကလေး ၈၆၇ ဦး ကျောင်းမတက်တာ ရှိတယ်လို့ အစိုးရကို သတင်းပို့ထားပါတယ်။ ဒါပေမဲ့ ဒီအရေအတွက်ဟာ ၂၀၂၁ ခုနှစ် ဩဂုတ်လအထိ ရရှိထားတဲ့အချက်အလက်ဖြစ်တယ် Yokohama ခရိုင် ပညာရေးဘုတ်အဖွဲ့က ပြောပါတယ်။ နိုင်ငံခြားသား ကလေးတွေ ကျောင်းတက်ရောက်ခြင်း ရှိ၊မရှိ အတည်ပြုဖို့အတွက် နိုင်ငံခြားသားတွေရဲ့နေအိမ်တွေကို စာပို့ပြီးစုံစမ်းတာ၊ ကိုယ်တိုင် သွားရောက်ပြီး စုံစမ်းမေးမြန်းတာတွေ ပြုလုပ်ခဲ့ပါတယ်။ ဒါပေမဲ့ ကလေး ၄၅၄ ဦးရဲ့ ပညာရေးအခြေအနေနဲ့ပတ်သက်ပြီး အတည်ပြုနိုင်ခြင်း မရှိသေးဘူးလို့ အဲဒီဘုတ်အဖွဲ့က ပြောပါတယ်။ မြို့အုပ်ချုပ်ရေး အရာရှိတွေရဲ့ အဆိုအရ အဲဒီကျောင်းမတက်နိုင်တဲ့ ကလေးတွေထဲမှာ အရေအတွက်အများဆုံးက တရုတ်လူမျိုးတွေ ဖြစ်ပြီး၊ တောင်ကိုရီးယား၊ ဖိလစ်ပိုင်၊ အိန္ဒိယ၊ ဗီယက်နမ်နဲ့ ဘရာဇီး တို့က အစဉ်အတိုင်းကျောင်းမတက်ကြတဲ့ ကလေးတွေများတယ်လို့ ဆိုပါတယ်။
PACIFICO (パシフィコ) Yokohama complex နေရာမှာရှိတဲ့ Yokohama Foreign Residents Information Center (横浜市多文化共生総合相談センター) မှာ ကျောင်းအပ်နှံတာစတဲ့ ပညာရေးဆိုင်ရာနဲ့ လူမှုဖူလုံရေးဆိုင်ရာ အကြံပေးဝန်ဆောင်မှုတွေကို ဂျပန်၊ အင်္ဂလိပ်၊ တရုတ်၊ ကိုးရီးယား၊ ဗီယက်နမ်၊ နီပေါ၊ အင်ဒိုနီးရှား၊ တဂါလော့၊ ထိုင်း၊ ပေါ်တူဂီ၊ စပိန်နဲ့ ယူကရိန်း စတဲ့ ဘာသာစကား ၁၂ မျိုးနဲ့ ဝန်ဆောင်မှု ပေးနေပါတယ်။ အဲဒီစင်တာရဲ့ ဖုန်းနံပါတ်ကတော့ 045-222-1209 ဖြစ်ပါတယ်။
Yokohama မြို့တစ်ဝန်းမှာ Yokohama International Lounges 「国際交流ラウンジ」လို့ လူသိများတဲ့ အတိုင်ပင်ခံဝန်ဆောင်မှုရုံး ၁၂ရုံး ရှိပါတယ်။ အဲဒီဒေသ၊ မြို့နယ်အလိုက်နေထိုင်သူတွေ အသုံးများတဲ့ ဘာသာစကားနဲ့ ပြောဆိုနိုင်သူကို စီစဉ်ပေးပြီး တွေ့ဆုံ ဆွေးနွေးအကြံဉာဏ် ရယူနိုင်ပါတယ်။ ဆက်သွယ်ဖို့အတွက် သိရမယ့် သတင်းအချက်အလက်နဲ့ လုပ်ငန်းဝန်ဆောင်မှုပေးချိန်နဲ့ပတ်သက်ပြီး Yokohama မြို့ရဲ့ အင်တာနက်စာမျက်နှာမှာ ဝင်ရောက်ကြည့်ရှု နိုင်ပါတယ်။
Kawasaki မြို့မှာတော့ ကျောင်းမတက်နိုင်တဲ့ကလေး အရေအတွက် ၁၆၇ ဦးရှိပြီး တရုတ်၊ တောင်ကိုရီးယား၊ အိန္ဒိယနဲ့ နီပေါနိုင်ငံသား တွေက များပြီး နိုင်ငံခြားသားကလေးအားလုံးရဲ့ တဝက်ကျော်ရှိပါ တယ်။
ဂျပန်ဘာသာနဲ့ ကျောင်းနဲ့သက်ဆိုင်တာကို မေးမြန်းစုံစမ်းချင်တယ် ဆိုရင် Kawasaki ခရိုင်ပညာရေးဘုတ်အဖွဲ့（川崎市教育政策局）ရဲ့ဖုန်းနံပါတ် 044-200-3758 ကို ဆက်သွယ်နိုင်ပါတယ်။
ဘာသာစကားပေါင်းစုံနဲ့ အတိုင်ပင်ခံဝန်ဆောင်မှု လိုအပ်သူတွေ ကတော့ Kawasaki International Center（川崎市国際交流センター） 044-455-8811 ကို ဖုန်းဆက်သွယ်ခေါ်ဆို မေးမြန်းနိုင် ပါတယ်။ အင်္ဂလိပ်၊ တရုတ်၊ ကိုးရီးယား၊ စပိန်၊ ပေါ်တူဂီ၊ တဂါလော့၊ ဗီယက်နမ်၊ ထိုင်း၊ အင်ဒိုနီးရှား၊ နီပေါအပြင် လွယ်ကူတဲ့ ဂျပန်စကားနဲ့ပါ ဝန်ဆောင်မှုပေးနေပါတယ်။ ဘာသာစကားအလိုက် အချိန်သတ်မှတ် ချက်ရှိတာကြောင့် အင်တာနက်စာမျက်နှာမှာ သိသင့်တဲ့ အချက်အလက်တွေကို အရင် ဝင်ရောက် ကြည့်ရှုထားဖို့ လိုအပ်ပါတယ်။
Kawasaki International Center （川崎市国際交流センター）က နိုင်ငံခြားသား မိဘတွေ မိမိရင်သွေးငယ်ကိုကျောင်းအပ်နှံနိုင်ဖို့ လိုအပ်တဲ့ သတင်းအချက်အလက်ရရှိအောင် မိတ်ဆက် ရှင်းလင်းပွဲကို နှစ်စဉ် ဖိတ်ကြားပါတယ်။ အခု ၂၀၂၃ ဘဏ္ဍာရေးနှစ်အတွက် ၂၀၂၄ ဇန်နဝါရီလ ၂၇ ရက်နေ့မှာ မိတ်ဆက်ရှင်းလင်းပွဲကို ပြုလုပ်ဖို့ စီစဉ်ထားပါတယ်။
မူလတန်းကျောင်းတစ်ကျောင်းရဲ့ ကျောင်းအုပ်ဟောင်းတစ်ဦးက နိုင်ငံခြားသားမိဘတွေနဲ့ ဆွေးနွေးပြောဆိုမှာဖြစ်ပြီး ဂျပန်ကျောင်းတွေ မှာ တက်ဖူးတဲ့ နိုင်ငံခြားသားကလေးတွေရဲ့ မိဘတွေကိုယ်တိုင် မေးခွန်းတွေကို ဖြေကြားပေးမှာ ဖြစ်ပါတယ်။ Kawasaki International Association（川崎市国際交流協会） တယ်လီဖုန်းနံပါတ် 044-435-7000 ကို ဆက်သွယ်မေးမြန်းနိုင် ပါတယ်။

ဒီသတင်းအချက်အလက်တွေက ၂၀၂၃ ခုနှစ် အောက်တိုဘာလက ရရှိထားတဲ့ အချက်အလက်တွေ ဖြစ်ပါတယ်။

ဂျပန်မှာနေထိုင်တဲ့ နိုင်ငံခြားသား ကလေးတွေ ကျောင်းတက်နိုင် ဖို့အတွက် လိုအပ်တဲ့အကူအညီတွေကို ဘယ်နေရာမှာ ရနိုင်သလဲ ကြည့်ကြရအောင်။
အခုတစ်ခေါက်မှာတော့ Chiba ခရိုင်မှာနေထိုင်တဲ့ နိုင်ငံခြားသား ကလေးတွေအတွက် အခြေအနေကို လေ့လာကြည့်ပါမယ်။
Chiba ခရိုင်မှာ ကျောင်းမတက်နိုင်တဲ့ နိုင်ငံခြားသားကလေး အရေအတွက်ဟာ ၂၀၂၂ ခုနှစ် မေလအထိ ၅၀၉ ဦးရှိတယ်လို့ သိရပါတယ်။ ခရိုင်အတွင်းမှာ Chiba မြို့က ကျောင်းမတက်တဲ့ နိုင်ငံခြားသားကလေး အရေအတွက် အမြင့်ဆုံးဖြစ်ပြီး ၂၁၉ ဦး ရှိပါတယ်။
Chiba မြို့ ပညာရေးဘုတ်အဖွဲ့က ကျောင်းမတက်နိုင်တဲ့ နိုင်ငံခြားသား ကလေးတွေရဲ့ အချက်အလက်တွေကို နိုင်ငံအလိုက် တရားဝင် စာရင်းမပြုစုရသေးပေမဲ့ ခန့်မှန်းခြေအားဖြင့် တရုတ်၊ ဖိလစ်ပိုင်၊ တောင်ကိုရီးယားနဲ့ ဗီယက်နမ်တွေက ကလေးတွေကျောင်းမတက်ရတဲ့ ရာခိုင်နှုန်းအားဖြင့် မြင့်လိမ့်မယ်လို့ ယူဆထားပါတယ်။
ကလေးကျောင်းထားဖို့ သိချင်တဲ့အချက်တွေရှိရင် Chiba မြို့ ပညာရေးဆိုင်ရာဘုတ်အဖွဲ့（千葉市教育委員会学事課）ရဲ့ ဖုန်းနံပါတ် 043-245-5927 ကို ဆက်သွယ်နိုင်ပါတယ်။ မြို့ပညာရေးဘုတ်အဖွဲ့မှာ အဓိကအားဖြင့် ဂျပန်ဘာသာနဲ့ တိုင်ပင်ဆွေးနွေးပေးပါတယ်။ Chiba City international Association (千葉市国際交流協会) မှာတော့ မြို့နေထိုင်သူလူ့အဖွဲ့အစည်းအတွင်း စကားပြန်/ဘာသာပြန် ဝန်ဆောင်မှုလည်း ရှိပါတယ်။ ဆက်သွယ်ရမယ့် ဖုန်းနံပါတ်ကတော့ 043-245-5750 ဖြစ်ပါတယ်။
Chiba ခရိုင်ထဲက Ichikawa မြို့ပညာရေးဆိုင်ရာဘုတ်အဖွဲ့က၂၀၂၂ ခုနှစ် မေလအထိအတွင်း ကျောင်းမတက်နိုင်တဲ့ကလေးငယ်ပေါင်း ၁၈၀ ရှိတယ်လို့ ဆိုပါတယ်။ ဒါဟာ ခရိုင်အတွင်း ဒုတိယအများဆုံး ဦးရေဖြစ်ပါတယ်။ ဒါပေမဲ့ နိုင်ငံခြားသားကလေးတွေရဲ့ ကျောင်း အပ်နှံတဲ့ အခြေအနေကို တကယ်တမ်း မေးမြန်းစုံစမ်း အတည်ပြုတာ အပြင် ပညာရေးဆိုင်ရာဘုတ်အဖွဲ့က သတင်းအချက်အလက်အလိုက် ကျောင်းမတက်တဲ့ ကလေးဦးရေကို ရေတွက်ပုံ ပြင်ဆင်ပြီးတဲ့နောက် မှာ အဲဒီကိန်းဂဏန်းထက် လျော့သွားတာ တွေ့ရပါတယ်။ ဒါပေမဲ့လည်း နိုင်ငံခြားသားကလေးတွေရဲ့ ကျောင်းအပ်နှံမှုအခြေအနေကို စုံစမ်းသိရှိ ဖို့ မလွယ်တာမျိုးလည်းရှိပါတယ်။ အဲဒီလိုကလေး အများစုက အိန္ဒိယနိုင်ငံ နဲ့ နီပေါနိုင်ငံတွေက ဖြစ်ပါတယ်။
Ichikawa မြို့အုပ်ချုပ်ရေးရုံးမှာ နိုင်ငံခြားသားတွေအတွက် ကျောင်းအပ် စာရင်းသွင်းတဲ့ ကိစ္စ အပါအဝင် အခြားအကြောင်းအရာ အမျိုးမျိုးအတွက် အကြံပေးဆွေးနွေးပေးတဲ့ ဝန်ဆောင်မှု（外国人相談窓口）ရှိပါတယ်။ ဆွေးနွေးစကားပြောတဲ့အခါ လိုအပ်ရင် computer tablet နဲ့ ဘာသာပြန်ပြီး ဝန်ဆောင်မှုပေးတာလည်း ရှိပါတယ်။ အသေးစိတ်အချက်အလက်တွေကို အဲဒီရုံးရဲ့ အင်တာနက် စာမျက်နှာမှာ ဝင်ရောက်ကြည့်ရှုနိုင်ပါတယ်။ ဆက်သွယ်ဖို့ ဖုန်းနံပါတ် ကတော့ 047-712-8675 ဖြစ်ပါတယ်။
ကိုယ်နေထိုင်တဲ့ မြို့က ဂျပန်အစိုးရကျောင်းတွေမှာ မိမိတို့ရဲ့ရင်သွေး တွေကို ကျောင်းအပ်နှံလိုတဲ့ နိုင်ငံခြားသား မိဘများအနေနဲ့ ဒေသန္တရ အုပ်ချုပ်ရေးရုံးမှာ အိမ်ထောင်စုစာရင်းနဲ့ နေရပ်လိပ်စာ မှတ်ပုံတင် စာရင်းသွင်းတဲ့အခါမှာကျောင်းအပ်ချင်တဲ့ မိမိဆန္ဒကိုပြောကြားပြီး ဒီရုံးမှာပဲ ကျောင်းအပ်ဖို့ လိုအပ်တဲ့စာရွက်စာတမ်းကိစ္စကို အပြည့်အစုံ ဆောင်ရွက်နိုင်ပါတယ်။
နေထိုင်ကြောင်းမှတ်ပုံတင်စာရင်းသွင်းပြီးနောက် လိုအပ်တဲ့ လုပ်ငန်းဆောင်တာတွေကို မလုပ်ရသေးတဲ့သူတွေ ဒါမှမဟုတ် မှတ်ပုံတင်စာရင်မသွင်းထားတဲ့သူတွေအနေနဲ့ ကိုယ်အမှန်တကယ် နေထိုင်တဲ့ မြို့နယ်ရဲ့ ပညာရေးအဖွဲ့（教育委員会）နဲ့ ဆွေးနွေးတိုင်ပင်ကြဖို့ အကြံပြုလိုပါတယ်။

ဒီသတင်းအချက်အလက်တွေက ၂၀၂၃ ခုနှစ် အောက်တိုဘာလက ရရှိထားတဲ့ အချက်အလက်တွေ ဖြစ်ပါတယ်။

ဂျပန်မှာ နေထိုင်တဲ့ နိုင်ငံခြားသားကလေးတွေ ကျောင်းတက်ဖို့အတွက် လိုအပ်တဲ့အကူအညီတွေ တောင်းခံနိုင်တဲ့နည်းလမ်းတွေကို လေ့လာ ကြည့်ကြပါမယ်။
အခုတစ်ခေါက်မှာတော့ lbaraki ခရိုင်မှာနေတဲ့ နိုင်ငံခြားသား ကလေးတွေ အခြေအနေကို လေ့လာကြည့်ပါမယ်။
၂၀၂၂ ခုနှစ် မေလအထိကောက်ယူထားတဲ့စာရင်းအရ lbaraki ခရိုင်မှာ ကျောင်းမတက်နိုင်တဲ့ နိုင်ငံခြားသားကလေး ၂၆၈ ဦးရှိပါတယ်။ အဲဒီခရိုင်ထဲက Joso မြို့မှာ ၁၀၇ ဦးရှိပြီး အရေအတွက် အများဆုံး ဖြစ်ပါတယ်။ အဲဒီနောက် Tsukuba မြို့မှာ ၈၁ ဦးနဲ့ Chikusei မြို့မှာ ၂၄ ဦး ရှိပါတယ်။
ပြောင်းရွှေ့နေထိုင်လာသူ နိုင်ငံခြားသားတွေအနေနဲ့ ဆန္ဒရှိတယ်ဆိုရင် မိမိတို့ရဲ့ကလေးတွေကို ကျောင်းအပ်နှံရေး လုပ်ငန်းစဉ်တွေကို ဆောင်ရွက်ကြဖို့ အဲဒီမြို့နှစ်မြို့လုံးရဲ့ တာဝန်ရှိသူတွေက အကြံပြုထားပါတယ်။
Joso မြို့မှာနေထိုင်တဲ့ ဘရာဇီးနဲ့ ဖိလစ်ပိုင်လူမျိုးနိုင်ငံခြားသားတွေ များပေမဲ့ ကျောင်းမတက်နိုင်တဲ့ နိုင်ငံခြားကလေးအရေအတွက်နဲ့ ပတ်သက်ပြီး နိုင်ငံအလိုက် တရားဝင်စာရင်းပြုစုထားတာ မရှိသေးဘူး လို့ မြို့ပညာရေးဆိုင်ရာ ဘုတ်အဖွဲ့က ပြောပါတယ်။
ဂျပန်စကားပြောဆိုနိုင်သူတွေအတွက် ပညာရေးဘုတ်အဖွဲ့ရဲ့ ကျောင်းရေးရာဌာန（教育委員会学校教育課）က ဆွေးနွေးအကြံပြု ဝန်ဆောင်မှုပေးနေပါတယ်။ ဆက်သွယ်ရမယ့်ဖုန်းနံပါတ်က 0297-44-6346 ဖြစ်ပါတယ်။
တခြားဘာသာစကားနဲ့ပြောဆိုပြီး အကူအညီ တောင်းချင်သူ တွေအတွက် “Division that thinks together with citizens” 「市民と共に考える課」မြို့မှာနေထိုင်သူတွေနဲ့အတူစဉ်းစားပေးတဲ့ ဌာနခွဲတစ်ခုကနေ ဘာသာပြန်ပေးပြီး ဝန်ဆောင်မှုပေးနေပါတယ်။ ဆက်သွယ်ရမယ့်ဖုန်းနံပါတ်က 0297-23-2145 ဖြစ်ပါတယ်။
Tsukuba မြို့မှာနေထိုင်တဲ့ နိုင်ငံခြားသားတွေထဲမှာ တရုတ်၊ ဗီယက်နမ်၊ တောင်ကိုးရီးယား နဲ့ ဖိလစ်ပိုင်လူမျိုးတွေ များတယ် လို့ အဲဒီမြို့အုပ်ချုပ်ရေးအဖွဲ့က ပြောပါတယ်။ ဒါပေမဲ့လည်း ကျောင်းမတက်နိုင်တဲ့ ကလေး ၈၁ ဦးဟာ ဘယ်နိုင်ငံသားတွေဖြစ်တယ် ဆိုတာမျိုး နိုင်ငံအလိုက်ခွဲပြီး စာရင်းပြုစုထားတာ မရှိသေးပါဘူး။ မိမိရင်သွေးကို မြို့တွင်းက အစိုးရကျောင်းမှာ အပ်နှံလိုတဲ့ အဲဒီမြို့မှာ နေထိုင်သူ နိုင်ငံခြားသားမိဘတွေအနေနဲ့ ပညာရေးဗျူရိုရဲ့ ကျောင်းရေးရာဌာန（教育局学務課）ကို သွားရောက်စုံစမ်းမေးမြန်းပါ ဒါမှမဟုတ် တယ်လီဖုန်းနဲ့အကြံဉာဏ်တောင်းခံချင်တယ်ဆိုရင် ဖုန်းနံပါတ် 029-883-1111 ခေါ်ဆိုပြီး တိုင်ပင်ဆွေးနွေးနိုင်ပါတယ်။ ကိုယ့်မိခင်ဘာသာစကားနဲ့ပဲ ဆွေးနွေးချင်တယ်ဆိုရင် မြို့အုပ်ချုပ်ရေးရုံးရဲ့ နိုင်ငံပေါင်းစုံအတူတကွနေထိုင်ရေး လှုံ့ဆော်မှု ဌာနခွဲ (国際都市推進課)က ကူညီဖြည့်စည်းပေးပါလိမ့်မယ်။
Ibaraki အခြေစိုက် Commons NPO အကျိုးအမြတ်ပဓာနမထားတဲ့ အဖွဲ့အစည်းက ကျောင်းအပ်နှံလိုတဲ့ နိုင်ငံခြားသားမိဘတွေအတွက် ကူညီပေးနေပါတယ်။ အဲဒီအဖွဲ့က Joso မြို့မှာ နေထိုင်သူတွေအပြင် Ibaraki ခရိုင်ထဲက တခြားမြို့နယ်တွေမှာနေထိုင်သူ နိုင်ငံခြားသားတွေ အတွက်ပါ အကြံပြုဝန်ဆောင်မှုတွေ ပေးနေပါတယ်။ ဂျပန်စကား မရသူတွေအတွက်လည်း အကြံပြု ဆွေးနွေးတာတွေကို အင်္ဂလိပ်၊ ပေါ်တူဂီ အပြင် Tagalog နဲ့ Urdu ဘာသာစကားတွေနဲ့ အချိန်ပေါ်မူတည်ပြီး ဝန်ဆောင်မှုပေးတာကြောင့် ကိုယ်က ဂျပန်စကားမရကြောင်း ကြိုတင်ပြီး ဆက်သွယ်ပြောဆိုပြီး သက်ဆိုင်ရာဘာသာစကားရဲ့အချိန်ကို သိအောင်လုပ်ဖို့လိုပါတယ်။ Commons NPO အဖွဲ့က နိုင်ငံခြားသားကလေးတွေ အထက်တန်းကျောင်းတက် ဖို့နဲ့ ပတ်သက်ပြီး အကြံပေးဝန်ဆောင်မှုတွေ တက်တက်ကြွကြွ လုပ်ဆောင်ပေးနေပါတယ်။ ဆက်သွယ်ရမယ့် ဖုန်းနံပါတ်ကတော့ 0297-44-4281 ဖြစ်ပါတယ်။
Ibaraki ခရိုင်မှာရှိတဲ့ အစိုးရ မူလတန်းကျောင်းတွေမှာ ရင်သွေးတွေကို ကျောင်းထားဖို့ ကြိုးပမ်းနေတဲ့ နိုင်ငံခြားသားမိဘတွေအနေနဲ့ မူအားဖြင့် မြို့နယ်ရုံးမှာ လိပ်စာပြောင်း မှတ်ပုံတင်စာရင်းသွင်းချိန်မှာ ကျောင်းအပ်လိုတယ်ဆိုတဲ့ မိမိတို့ရည်ရွယ်ချက်ကိုပါ တစ်ခါတည်း ပြောပြီး ဒေသန္တရပညာရေးဘုတ်အဖွဲ့ဆီမှာ ကျောင်းအပ်ဖို့ လုပ်ငန်းစဉ် တွေကို လုပ်ဆောင်ဖို့ လိုအပ်ပါတယ်။ မိသားစုနဲ့ အိမ်လိပ်စာကို ရပ်ကွက်ရုံးမှာ မှတ်ပုံတင်စာရင်းသွင်းတာ မပြီးသေးတာ ဒါမှမဟုတ် မှတ်ပုံတင်စာရင်းမသွင်းထားတာမျိုးဆိုရင် ကိုယ်အမှန်တကယ် နေထိုင်တဲ့ မြို့နယ်ရဲ့ ပညာရေးအဖွဲ့（教育委員会）နဲ့ ဆွေးနွေးတိုင်ပင်ကြဖို့ အကြံပြုလိုပါတယ်။

ဒီသတင်းအချက်အလက်တွေက ၂၀၂၃ ခုနှစ် အောက်တိုဘာလက ရရှိထားတဲ့ အချက်အလက်တွေ ဖြစ်ပါတယ်။

အခုတစ်ခေါက်မှာတော့ Gunma ခရိုင်မှာ နေထိုင်တဲ့ နိုင်ငံခြားသား ကလေးတွေ ကျောင်းတက်ဖို့အတွက် လိုအပ်တဲ့အကူအညီတွေ တောင်းခံနိုင်တဲ့ နည်းလမ်းတွေကို လေ့လာကြည့်ကြပါမယ်။
၂၀၂၂ ခုနှစ် မေလအထိကောက်ယူထားတဲ့စာရင်းအရ Gunma ခရိုင်မှာ ကျောင်းမတက်နိုင်တဲ့ နိုင်ငံခြားသားကလေး ၂၃၃ ဦးရှိပါတယ်။ အဲဒီခရိုင်ထဲက Ota မြို့မှာ ၁၃၇ ဦးရှိပြီး အရေအတွက် အများဆုံး ဖြစ်ပါတယ်။ အဲဒီနောက် Isesaki မြို့မှာ ၆၃ ဦးနဲ့ Oizumi မြို့မှာ ၁၃ ဦး ရှိပါတယ်။
Gunma ခရိုင်မှာ နိုင်ငံခြားသား ကလေးငယ်တွေ ပညာဆည်းပူးနိုင်ဖို့အတွက် “Harmony” လို့ခေါ်တဲ့ အင်တာနက် စာမျက်နှာတစ်ခုကို အထူးပြုလုပ်ပြီး သတင်းအချက်အလက်တွေကို တင်ထားပါတယ်။ အဲဒီစာမျက်နှာမှာ ကျောင်းအပ်နှံဖို့အတွက် လိုအပ် တဲ့ လုပ်ငန်းစဉ်တွေနဲ့ ပတ်သက်ပြီးရှင်းပြထားတဲ့အပြင် နိုင်ငံခြားသား ကလေးတွေ ဂျပန်ကျောင်းတက်နေပုံတွေကို ဘာသာစကား ၇ မျိုးနဲ့ ဗီဒီယိုဖိုင်တွေတင်ထားပါတယ်။ ဒါ့အပြင် ကျောင်းနဲ့ပတ်သက်နေတဲ့ ဝန်ထမ်းတွေအတွက် နိုင်ငံခြားသားကျောင်းသားတွေကိုလက်ခံတဲ့ ပတ်ဝန်းကျင်တစ်ခု ဖွံ့ဖြိုးတိုးတက်လာအောင် ဘယ်လိုဖော်ဆောင် ရမယ် ဆိုတာကို ရှင်းလင်းပြသထားတဲ့အပြင် ဂျပန်ဘာသာစကားကို ဘယ်လိုမျိုး ရှေ့ဆက် သင်ကြားပေးရမယ်ဆိုတာတွေကို အသေးစိတ် ရှင်းလင်းပြောပြထားပါတယ်။
Ota မြို့မှာ စက်မှုကုန်ထုတ်လုပ်ငန်းကုမ္ပဏီတွေ အများအပြား ရှိတာကြောင့် ဘရာဇီး၊ ပီရူး၊ တရုတ်နဲ့ ဖိလစ်ပိုင် လူမျိုး နိုင်ငံခြားသားတွေ ပြောင်းရွှေ့နေထိုင်လာတာ အများကြီး ရှိပါတယ်။ ကျောင်းမတက်နိုင်တဲ့ နိုင်ငံခြားသား ကလေး ၁၃၇ ဦးနဲ့ပတ်သက်ပြီး နိုင်ငံအလိုက် တရားဝင်စာရင်းပြုစုထားတာ မရှိသေးဘူးလို့ အဲဒီမြို့ရဲ့ ပညာရေး ဘုတ်အဖွဲ့က ပြောပါတယ်။ Ota မြို့ပညာရေးဘုတ်အဖွဲ့က ကျောင်းအပ်နှံဖို့နဲ့ပတ်သက်ပြီး ဆွေးနွေးအကြံပြု ဝန်ဆောင်မှုပေးနေ ပါတယ်။ ဆက်သွယ်ရမယ့် ဖုန်းနံပါတ်က 0276-20-7084 ဖြစ်ပါ တယ်။ ဝန်ဆောင်မှုတွေကို ဂျပန်ဘာသာစကား တစ်မျိုးတည်းနဲ့ပဲ ပြုလုပ်ပေးပါတယ်။
Isesaki မြို့မှာ ဘရာဇီး၊ ပီရူးနဲ့ ဖိလစ်ပိုင် နိုင်ငံတွေကလာတဲ့ နိုင်ငံခြားသားနေထိုင်သူတွေ အများအပြား နေထိုင်ပါတယ်။ ကျောင်းမတက်နိုင်တဲ့ နိုင်ငံခြားသား ကလေး ၆၃ ဦးနဲ့ပတ်သက်ပြီး နိုင်ငံအလိုက် တရားဝင်စာရင်းပြုစုထားတာ မရှိသေးဘူးလို့ အဲဒီမြို့ရဲ့ ပညာရေး ဘုတ်အဖွဲ့က ပြောပါတယ်။ အဲဒီမြို့ဒေသန္တရရုံးမှာရှိတဲ့ General Consultation Counter for Foreigners (外国人総合相談窓口) အမည်နဲ့ဌာနမှာ ကျောင်းအပ်နှံဖို့နဲ့ပတ်သက်ပြီး ဆွေးနွေးနိုင်ပါတယ်။ ဘာသာစကားပေါင်းစုံနဲ့ ကူညီပံ့ပိုးမှုတွေနဲ့ ပတ်သက်ပြီး အသေးစိတ်ကို မြို့ အင်တာနက်စာမျက်နှာမှာ ဖတ်ရှု လေ့လာနိုင်ပါတယ်။ လူကိုယ်တိုင်လာရောက် ဆွေးနွေးလိုသူတွေ အနေနဲ့ ရုံးဖွင့်ရက်မှာ မြို့အုပ်ချုပ်ရေးရုံးမှာ လာရောက်ဆွေးနွေး နိုင်ပါတယ်။ ဆက်သွယ်ရမယ့် ဖုန်းနံပါတ်က 0270-24-5111 ဖြစ်ပါတယ်။
Oizumi မြို့မှာမြို့နေလူဦးရေရဲ့ ၂၀ ရာခိုင်နှုန်းဝန်းကျင်က နိုင်ငံခြားသား နေထိုင်သူတွေဖြစ်တော့ ဂျပန်ရဲ့ မသင်မနေရပညာရေးစနစ်နဲ့ မူလတန်းကျောင်းမတက်ခင် လိုအပ်တဲ့ လုပ်ငန်းဆောင်တာတွေကို နိုင်ငံခြားသားတွေရဲ့အိမ်ထောင်စုတွေအတွက် ရှင်းလင်းပြောပြတာကို နှစ်စဉ် ပြုလုပ်ပေး နေပါတယ်။
ကလေးတချို့က ပြည်တွင်းမှာရှိတဲ့ International schoolတွေမှာ တက်နေပြီး ဘာကျောင်းမှမတက်တဲ့ တခြားနိုင်ငံခြားသားကလေးတွေ ကျောင်းမတက်ဘဲနေတာ မျိုးမရှိရအောင် Oizumi မြို့က ကြိုးပမ်းလုပ်ဆောင်နေပါတယ်။ （教育委員会教育管理課）ဒေသန္တရပညာရေးဘုတ်အဖွဲ့ရဲ့ကလေးပညာရေးကြီးကြပ်မှုဌာနက ကျောင်းအပ်နှံမှုနဲ့ ပတ်သက်ပြီး အကြံပေး ဆောင်ရွက်ပေးနေပါတယ်။ ဆက်သွယ်ရမယ့်ဖုန်းနံပါတ်က 0276-63-3111 (တိုက်ရိုက်လိုင်း- 311) ဖြစ်ပါတယ်။ လိုအပ်ရင် ပေါ်တူဂီ၊ စပိန်ဘာသာစကားတွေနဲ့ လည်း အတိုင်ပင်ခံ ဆွေးနွေးပေးနေပါတယ်။
Isesaki မြို့မှာ G Community (Gコミュニティ) လို့ခေါ်တဲ့ NPO အဖွဲ့က အမြတ်အစွန်းပဓာနမထားဘဲ နိုင်ငံခြားသားကလေးတွေရဲ့ ပညာရေးနဲ့ ကျောင်းအပ်နှံမှုတွေနဲ့ပတ်သက်ပြီး ဝန်ဆောင်မှုပေး ပါတယ်။ အီးမေးလ်နဲ့သာ ဆက်သွယ်ဆွေးနွေးနိုင်ပါတယ်။ တယ်လီဖုန်းဆက်ပြီး တိုင်ပင်ဆွေးနွေးလို့ မရနိုင်ပါ။ ဆက်သွယ်ရမယ့် အီးမေးလ်လိပ်စာစတဲ့အချက်အလက်တွေကို G Community လို့ အင်တာနက် စာမျက်နှာမှာ ရှာဖွေပြီးလေ့လာနိုင် ပါတယ်။
Gunma ခရိုင်တွင်းက အစိုးရ မူလတန်းကျောင်းတွေမှာ ရင်သွေးတွေကို ကျောင်းအပ်နှံဖို့ ကြိုးပမ်းနေတဲ့ နိုင်ငံခြားသား မိဘတွေအနေနဲ့ မူအားဖြင့် မြို့နယ်ရုံးမှာ လိပ်စာပြောင်း မှတ်ပုံတင်စာရင်းသွင်းချိန်မှာ ကျောင်းအပ်လိုတယ်ဆိုတဲ့ မိမိတို့ ရည်ရွယ်ချက်ကိုပါ တစ်ခါတည်းပြောပြီး ဒေသန္တရပညာရေး ဘုတ်အဖွဲ့ဆီမှာ ကျောင်းအပ်ဖို့ လုပ်ငန်းစဉ်တွေကို လုပ်ဆောင်ဖို့ လိုအပ်ပါတယ်။ အိမ်ထောင်စုစာရင်းနဲ့အိမ်လိပ်စာကို ရပ်ကွက်ရုံးမှာ မှတ်ပုံတင်စာရင်းသွင်းမှု မပြီးသေးတာ ဒါမှမဟုတ် မှတ်ပုံတင်စာရင်း မသွင်းထားတာ မျိုးဆိုရင် ကိုယ်အမှန်တကယ်နေထိုင်တဲ့ မြို့နယ်ရဲ့ ပညာရေးအဖွဲ့（教育委員会）နဲ့ ကလေးကျောင်းကိစ္စကို ဆွေးနွေးတိုင်ပင်ကြဖို့ အကြံပြုလိုပါတယ်။

ဒီသတင်းအချက်အလက်တွေက ၂၀၂၃ ခုနှစ် နိုဝင်ဘာလက ရရှိထားတဲ့ အချက်အလက်တွေ ဖြစ်ပါတယ်။

အခုတစ်ခေါက်မှာတော့ Saitama ခရိုင်မှာ နေထိုင်တဲ့ နိုင်ငံခြားသားကလေးတွေ ကျောင်းတက်ဖို့အတွက် လိုအပ်တဲ့အကူအညီတွေ တောင်းခံနိုင်တဲ့နည်းလမ်းတွေကို လေ့လာ ကြည့်ကြပါမယ်။
၂၀၂၂ ခုနှစ် မေလအထိကောက်ယူထားတဲ့စာရင်းအရ Saitama ခရိုင်မှာ　ကျောင်းမတက်နိုင်တဲ့ နိုင်ငံခြားသားကလေး ၂၁၈ ဦးရှိပါတယ်။ အဲဒီခရိုင်ထဲက Toda မြို့မှာ ၄၅ ဦးရှိပြီး အရေအတွက် အများဆုံး ဖြစ်ပါတယ်။ အဲဒီနောက် Soka မြို့မှာ ၃၉ ဦးနဲ့ Misato မြို့မှာ ၂၁ ဦး ရှိပါတယ်။ ဒီ မြို့(၃)မြို့ကို နိုင်ငံခြားသားတွေက ကလေးတွေနဲ့အတူ ပြောင်းရွှေ့လာတဲ့အခါ သူတို့ရဲ့ကလေးတွေ အစိုးရကျောင်းတွေမှာထားချင်တဲ့ ဆန္ဒ ရှိ၊မရှိ မြို့အရာရှိတွေက မေးမြန်းပြီး ကျောင်းအပ်ချင်တယ်ဆိုရင် လိုအပ်တဲ့ လုပ်ငန်းစဉ်တွေကို လမ်းညွှန်ပေးတယ်လို့ ဆိုပါတယ်။
Toda မြို့က နိုင်ငံခြားသားနေထိုင်သူတွေကို ဆွေးနွေးပေးတဲ့（外国人相談窓口）ဌာနမှာ ကလေးများကျောင်းအပ်နှံရေးနဲ့ပတ်သက်ပြီး ကူညီပေးနေပါတယ်။ နိုင်ငံခြားသားတစ်ဦးက မြို့နယ်ကဒေသန္တရ အုပ်ချုပ်ရေးရုံးကို လာရောက်စုံစမ်းမယ်ဆိုရင် ကျောင်းအပ်နှံရေးတာဝန်ခံဝန်ထမ်းက လိုအပ်တဲ့ လုပ်ငန်းစဉ်တွေအတွက် လိုက်လံကူညီဆောင်ရွက်ပေးမှာ ဖြစ်တယ်လို့ဆိုပါတယ်။ အင်္ဂလိပ်၊တရုတ် ဘာသာစကားတွေနဲ့လည်း ဝန်ဆောင်မှုပေးတယ်လို့ မြို့အရာရှိတွေက ပြောပါတယ်။ ဒါပေမဲ့ ရနိုင်တဲ့ဘာသာစကားတွေဟာ ရက်သတ္တပတ်ရဲ့နေ့ရက်နဲ့အချိန်ပေါ် မူတည်ပြီးမတူတာကြောင့် လာရောက်မယ့်သူတွေအနေနဲ့ ဘယ်ဘာသာစကားနဲ့ ဘယ်နေ့မှာ ဝန်ဆောင်မှုပေးတယ်ဆိုတာကို မြို့ရဲ့အင်တာနက်စာမျက်နှာမှာ အရင်ဖတ်ရှုလေ့လာကြည့်ပြီးမှသာ သွားသင့်ပါတယ်။ အင်္ဂလိပ်၊ တရုတ်ဘာသာစကားနဲ့ မဟုတ်ဘဲ တခြားဘာသာစကားတွေဆိုရင် ဘာသာပြန်အပလီကေးရှင်းကိုသုံးပြီး တိုင်ပင်ဆွေးနွေးနိုင်အောင် ဆောင်ရွက်ပေးမှာ ဖြစ်ပါတယ်။
ဂျပန်စကားပြောတတ်သူတွေအတွက်ကတော့ Toda မြို့ရဲ့ Cooperation Promotion Division (市民生活部協働推進課) ပူးပေါင်းဆောင်ရွက်မှုမြှင့်တင်လုပ်ဆောင်ရေးဌာနမှာ ကျောင်းအပ်နှံဖို့နဲ့ပတ်သက်ပြီး ဆွေးနွေးတိုင်ပင်နိုင်ပါတယ်။ ဆက်သွယ်ရမယ့် ဖုန်းနံပါတ်က 048-441-1800 ဖြစ်ပါတယ်။
Toda ဒေသန္တရပညာရေးစင်တာ (戸田市教育センタ-) မှာ နိုင်ငံခြားသားတွေ ကျောင်းအပ်နှံဖို့နဲ့ပတ်သက်တဲ့ အကြံပြုချက်တွေ ရရှိနိုင်ပါတယ်။ ဆက်သွယ်ရမယ့် ဖုန်းနံပါတ်က 048-434-5660 ဖြစ်ပါတယ်။
Soka မြို့မှာတော့ နိုင်ငံခြားသားကလေးတွေ ကျောင်းအပ်နှံနိုင်ရေး ကူညီပံ့ပိုးတဲ့စီမံချက်ရဲ့ တစ်စိတ်တစ်ပိုင်းအနေနဲ့ ဂျပန်စကား မပြောတတ်တဲ့ကလေးတွေအတွက် ဂျပန်ယဉ်ကျေးမှုနဲ့ စကားပြော အခြေခံသင်တန်းတွေ ဖွင့်လှစ်ပေးထားပါတယ်။
အင်္ဂလိပ်၊ တရုတ်၊ စပိန်၊ ကိုးရီးယား၊ ထိုင်းနဲ့ ပြင်သစ် ဘာသာစကားပြောသူတွေ ကလေးကျောင်းအပ်နှံဖို့အတွက် တိုင်ပင်မယ်ဆိုရင် ဝန်ဆောင်မှုတွေကို မြို့ဒေသန္တရရုံးရဲ့ Kokusai So-dan Corner (国際相談コーナー) နိုင်ငံတကာ အတိုင်ပင်ခံဌာနက တနင်္လာ၊ ဗုဒ္ဓဟူးနဲ့ သောကြာနေ့တိုင်း ဖွင့်လှစ်ဆောင်ရွက်ပေးနေ ပါတယ်။ အင်္ဂလိပ်နှင့် တရုတ် ဘာသာစကား မဟုတ်တဲ့ တခြားဘာသာစကားတွေနဲ့ ပံ့ပိုးကူညီတာလိုတယ်ဆိုရင် ကြိုတင်ဖုန်းဆက် ချိန်းဖို့ လိုပါတယ်။ အဲဒါကြောင့် ကျေးဇူးပြုပြီး ဖုန်းနံပါတ်: 048-922-2970 ကို ဆက်သွယ်စုံစမ်းနိုင် ပါတယ်။
Misato မြို့အရာရှိတွေကတော့ အဲဒီမြို့ကို ပြောင်းရွှေ့လာကြတဲ့ နိုင်ငံခြားသားတွေကို ကလေးတွေကျောင်းအပ်ဖို့ဆန္ဒရှိမရှိ မေးမြန်းပြီး ကျောင်းအပ်နှံလိုတယ်ဆိုရင် ကလေးတွေကျောင်းမတက်ခင် နှစ်တစ်နှစ်ရဲ့အောက်တိုဘာလမှာ ကျောင်းဝင်ခွင့်နဲ့ပတ်သက်တဲ့ လမ်းညွှန်ချက်လျှောက်လွှာစတာတွေကို အိမ်ကိုစာတိုက်ကနေတစ်ဆင့် ပေးပို့တယ်လို့ သိရပါတယ်။ အဲဒီမြို့မှာရှိတဲ့ မူလတန်း ဒါမှမဟုတ် အလယ်တန်းကျောင်းတွေမှာ မိမိတို့ရဲ့ ရင်သွေးတွေကို ကျောင်းအပ်ချင်တဲ့ နိုင်ငံခြားသားမိဘတွေအနေနဲ့ မြို့ရဲ့ ကျောင်းပညာရေးအဖွဲ့ရဲ့ Gakumu-ka (学務課) ကျောင်းရေးရာဌာနကို လာရောက်ပြီး လိုအပ်တဲ့ လုပ်ငန်းစဉ်တွေ လုပ်ဆောင်ကြဖို့ နှိုးဆော်ထားပါတယ်။ ဆက်သွယ်ရမယ့်ဖုန်းနံပါတ်က Misato City Board of Education Gakumu-ka (教育委員会学務課) 048-930-7756 ဖြစ်ပါတယ်။ ဝန်ဆောင်မှုတွေကို ဂျပန်ဘာသာနဲ့သာ ဆောင်ရွက်ပေးပါတယ်။
Saitama ခရိုင်တွင်းက အစိုးရ မူလတန်းကျောင်းတွေမှာ ရင်သွေးတွေကို ကျောင်းအပ်နှံဖို့ ကြိုးပမ်းနေတဲ့ နိုင်ငံခြားသား မိဘတွေအနေနဲ့ မူအားဖြင့် မြို့နယ်ရုံးမှာ လိပ်စာပြောင်း မှတ်ပုံတင်စာရင်းသွင်းချိန်မှာ ကျောင်းအပ်လိုတယ်ဆိုတဲ့ မိမိတို့ရည်ရွယ်ချက်ကိုပါ တစ်ခါတည်းပြောပြီး ဒေသန္တရပညာရေး ဘုတ်အဖွဲ့ဆီမှာ ကျောင်းအပ်ဖို့ လုပ်ငန်းစဉ်တွေကို လုပ်ဆောင်ဖို့ လိုအပ်ပါတယ်။ အိမ်ထောင်စုစာရင်းနဲ့အိမ်လိပ်စာကို ရပ်ကွက်ရုံးမှာ မှတ်ပုံတင်စာရင်းသွင်းမှု မပြီးသေးတာ ဒါမှမဟုတ် မှတ်ပုံတင်စာရင်းမသွင်းထားတာ မျိုးဆိုရင် ကိုယ်အမှန်တကယ်နေထိုင်တဲ့ မြို့နယ်ရဲ့ ပညာရေးအဖွဲ့（教育委員会）နဲ့ ကလေးကျောင်းကိစ္စကိုဆွေးနွေးတိုင်ပင်ကြဖို့ အကြံပြုလိုပါတယ်။

ဒီသတင်းအချက်အလက်တွေက ၂၀၂၃ ခုနှစ် နိုဝင်ဘာလက ရရှိထားတဲ့ အချက်အလက်တွေ ဖြစ်ပါတယ်။

အခုတစ်ခေါက်မှာတော့ Tochigi ခရိုင်မှာ နေထိုင်တဲ့ နိုင်ငံခြားသားကလေးတွေ ကျောင်းတက်ဖို့အတွက် လိုအပ်တဲ့အကူအညီတွေ တောင်းခံနိုင်တဲ့နည်းလမ်းတွေကို လေ့လာ ကြည့်ကြပါမယ်။
Tochigi ခရိုင်မှာရှိတဲ့ မူလတန်းကျောင်းတွေမှာ ပညာသင်ကြားနေတဲ့ နိုင်ငံခြားသား ကလေးတွေရဲ့ ထက်ဝက်ကျော်က ဘရာဇီး၊ ပီရူးနဲ့ ဖိလစ်ပိုင်နိုင်ငံ (၃)နိုင်ငံက ဖြစ်ကြပါတယ်။ စက်ရုံအလုပ်ရုံတွေ အများအပြားရှိတဲ့ ခရိုင်တောင်ပိုင်းက တချို့ဧရိယာတွေမှာ နိုင်ငံခြားသားကလေးတွေ အများအပြားနေထိုင်ကြပါတယ်။ ခရိုင်မြောက်ပိုင်းမှာတော့ နိုင်ငံခြားသားမိသားစုတွေ ဟိုတစ်စု သည်တစ်စု နေထိုင်လေ့ရှိကြပါတယ်။
Tochigi ခရိုင်ပညာရေးဘုတ်အဖွဲ့က နိုင်ငံခြားသားကလေးတွေကို လက်ခံဖို့အတွက် ဂျပန်ကကျောင်းအားလုံးကို ကောင်းကောင်းပြင်ဆင်ဖို့ လိုအပ်တယ်လို့ ပြောပါတယ်။ ခရိုင်ပညာရေးဘုတ်အဖွဲ့ဟာ နိုင်ငံခြားသားကလေးငယ်တွေရဲ့ ပညာရေးကို မြှင့်တင်ဆောင်ရွက်ပေးဖို့အတွက် မူလတန်းကျောင်း ၃၁ ကျောင်းနဲ့ အလယ်တန်းကျောင်း ၈ ကျောင်းတို့မှာ ဂျပန်စကားပြော သင်တန်းတွေ ဖွင့်ထားပြီး သင်ကြားရေးပိုင်းမှာလည်း ဘာသာပြန်နဲ့ ပံ့ပိုးကူညီမှုတွေကို ဖြည့်စည်းဆောင်ရွက်ပေးနေပါတယ်။ ပညာရေးစနစ် ပိုမိုတိုးတက်ကောင်းမွန်လာအောင် ဘယ်လို ဖော်ဆောင်ကြမယ်ဆိုတာကို ဆွေးနွေးတဲ့ လုပ်ငန်းအစည်းအဝေးတွေ ကျင်းပတာလိုမျိုး တာဝန်ကျ ဆရာ၊ဆရာမတွေက ကြီးကြပ်လုပ်ဆောင်နေတယ်လို့ ဘုတ်အဖွဲ့က ပြောပါတယ်။
၂၀၂၂ ခုနှစ် မေလအထိကောက်ယူထားတဲ့စာရင်းအရ Tochigi ခရိုင်မှာ ကျောင်းမတက်တဲ့ နိုင်ငံခြားသားကလေး ၅၀ ဦး ရှိပါတယ်။ အဲဒီခရိုင်ထဲက Utsunomiya မြို့မှာ ၂၀ ဦးရှိပြီး အရေအတွက် အများဆုံး ဖြစ်ပါတယ်။ အဲဒီနောက် Oyama မြို့မှာ ၁၂ ဦးရှိပါတယ်။
Tochigi မြို့ နိုင်ငံတကာအသင်း (国際交流協会) အောက်မှာ နိုင်ငံခြားသားနေထိုင်သူတွေအတွက် ဆွေးနွေးပေးတဲ့ စင်တာလည်း ရှိပါတယ်။ (とちぎ外国人相談サポートセンター) ဖြစ်ပြီး ခရိုင်တွင်းနေထိုင်သူ နိုင်ငံခြားသားတွေအတွက် ပညာရေးအကြံပေးမှု အပါအဝင် အကြံပေးမှုတွေကို ပေါ်တူဂီ၊ စပိန်၊ ဗီယက်နမ်၊ Tagalog တာ့ဂါ့လော့ အပါအဝင် ဘာသာစကား ၁၁ မျိုးနဲ့ ဝန်ဆောင်မှု ပေးနေပါတယ်။ လိုအပ်တဲ့သတင်း အချက်အလက်တွေနဲ့ အကြံဉာဏ်တွေ ရယူလိုသူတွေအတွက် ဘယ်ရုံး၊ ဘယ်ဌာနကို သွားရောက် အကူအညီရယူရမယ်ဆိုတာကို အဲဒီစင်တာက ဖုန်းကိုဆက်သွယ်ပါ။ ကူညီပေးနေပါတယ်။ ဆက်သွယ်ရမယ့် ဖုန်းနံပတ်က 028-627-3399 ဖြစ်ပါတယ်။
Utsunomiya မြို့မှာ ကျောင်းအပ်နှံဖို့ အကြံပေးဆွေးနွေးမှုတွေကို မြို့ပညာရေးဘုတ်အဖွဲ့ရဲ့ ကျောင်းရေးရာဌာန（教育委会学校管理課）က လက်ခံဆောင်ရွက်ပေးနေပါတယ်။ ဆက်သွယ်ရမယ့် ဖုန်းနံပါတ်က 028-632-2723 ဖြစ်ပါတယ်။ ဂျပန်ဘာသာစကားတစ်မျိုးထဲပဲ ဝန်ဆောင်ပေးပါတယ်။
မော်တော်ကားနဲ့ဆက်စပ်တဲ့ စက်ရုံတွေတည်ရှိရာ Oyama မြို့မှာတော့ ကလေးအများအပြားဟာ ဘရာဇီး၊ ပီရူး၊ ပါကစ္စတန်နဲ့ ကမ္ဘောဒီယား တွေ ဖြစ်ကြပါတယ်။ ဒါပေမဲ့ အဲဒီမြို့မှာ ကျောင်းမတက်နိုင်တဲ့ နိုင်ငံခြားသားကလေး ၁၂ ဦးရှိပြီး အရာရှိတွေက ဘယ်နိုင်ငံက ကလေးတွေလည်းဆိုတာ စာရင်းမပြုစုရသေးပါဘူး။ အဲဒီမြို့မှာ သူတို့ရဲ့ ဂျပန်စကားပြောနိုင်စွမ်းနဲ့ပတ်သက်ပြီး စိုးရိမ်နေတဲ့ နိုင်ငံခြားသားကလေးတွေအတွက် ဂျပန်စာအတန်းတွေ ဖွင့်လှစ် သင်ကြားပေးပါတယ်။
ဂျပန်စကားမတတ်တဲ့ကလေးတွေအတွက် မြို့တွင်းက Joto မူလတန်းကျောင်းမှာ အင်္ဂလိပ်၊ ပေါ်တူဂီ၊စပိန်၊ ထိုင်း၊တရုတ်ဘာသာစကားတွေတတ်တဲ့ ဆရာဆရာမကဂျပန်စာကို သင်ပေးတဲ့ ဝန်ဆောင်မှုကို ပေးနေပါတယ်။ မြို့ပညာရေးဘုတ်အဖွဲ့ရဲ့ ကျောင်းပညာရေးဆိုင်ရာဌာန（学校教育課）မှာ ကျောင်းအပ်နှံတာနဲ့ပတ်သက်ပြီး ဆွေးနွေးတိုင်ပင်နိုင်ပါတယ်။ ဆက်သွယ်ရမယ့် ဖုန်းနံပါတ်က 028-522-9632 ဖြစ်ပါတယ်။ ဂျပန်ဘာသာစကားဖြင့်သာ ဝန်ဆောင်မှုပေးပါတယ်။
Tochigi ခရိုင်တွင်းက အစိုးရ မူလတန်းကျောင်းတွေမှာ ရင်သွေးတွေကို ကျောင်းအပ်နှံဖို့ ကြိုးပမ်းနေတဲ့ နိုင်ငံခြားသား မိဘတွေအနေနဲ့ မူအားဖြင့် မြို့နယ်ရုံးမှာ လိပ်စာပြောင်း မှတ်ပုံတင်စာရင်းသွင်းချိန်မှာ ကျောင်းအပ်လိုတယ်ဆိုတဲ့ မိမိတို့ရည်ရွယ်ချက်ကိုပါ တစ်ခါတည်းပြောပြီး ဒေသန္တရပညာရေး ဘုတ်အဖွဲ့ဆီမှာ ကျောင်းအပ်ဖို့ လုပ်ငန်းစဉ်တွေကို လုပ်ဆောင်ဖို့ လိုအပ်ပါတယ်။ အိမ်ထောင်စုစာရင်းနဲ့အိမ်လိပ်စာကို ရပ်ကွက်ရုံးမှာ မှတ်ပုံတင်စာရင်းသွင်းမှုမပြီးသေးတာ ဒါမှမဟုတ် မှတ်ပုံတင်စာရင်းမသွင်းထားတာ မျိုးဆိုရင် ကိုယ်အမှန်တကယ်နေထိုင်တဲ့ မြို့နယ်ရဲ့ ပညာရေးအဖွဲ့（教育委員会）နဲ့ ကလေးကျောင်းကိစ္စကို ဆွေးနွေးတိုင်ပင်ကြဖို့ အကြံပြုလိုပါတယ်။

ဒီသတင်းအချက်အလက်တွေက ၂၀၂၃ ခုနှစ် နိုဝင်ဘာလက ရရှိထားတဲ့ အချက်အလက်တွေ ဖြစ်ပါတယ်။